呢间主打亲民价铁板烧嘅餐厅最近喺铜锣湾开旗舰店,占地14,000尺,主要分为五大区域:铁板烧区、寿司吧、炭火烧区、清酒吧同品酒区。铁板烧方面$380起就食到南非鲍鱼、牛肉薄烧等10道菜套餐!寿司吧同炭火烧区同样有水准,前者有大仓正孝师傅坐镇,後者选用日本纪州备长炭。
板神鉄板烧日本料理铜锣湾旗舰店请嚟着名室内设计师梁志天先生设计,以火山为主题。值得一提系有八间铁板烧独立房,包括三间VIP房,最大嘅最多可以坐到24人!
铁板烧区
特选套餐($380/位)
同观塘、湾仔店一样,铜锣湾店依然供应抵食铁板烧套餐,$380起就可以食到10道菜:前菜、季节沙律、南非鲍鱼、带子/大虾/法国鹅肝(三选一)、季节野菜、牛肉、炒饭、渍物、汤、甜品/咖啡/红茶。
南非鲍鱼
南非鲍鱼非常新鲜,放上铁板之前仲郁紧㗎!师傅先煎後焗,令鲍鱼肉厚爽甜。
带子
大虾
法国鹅肝
其中一道菜系带子、大虾、法国鹅肝三选一,带子配搭黑鱼子酱增添鲜味。大虾煎嘅时候就会加入以虾膏熬煮而成嘅酱汁,令爽脆虾肉味道更香浓。法国鹅肝油脂丰富入口即溶,加上面包可以吸走多余油分。
美国牛肉(薄烧)
A5和牛(厚烧)(+$220)
美国牛肉薄烧选用肉香浓厚嘅肉眼部位,卷入葱粒同炸蒜片,牛肉嘅肉汁同蒜香系绝配!而如果想感受入口即溶嘅感觉,就建议大家升级食A5和牛厚烧,西冷油花分布平均细致,肉质非常柔软。
炒饭
甜品:焦糖多士
炒饭加入鸡蛋、洋葱等多款配料炒成,饭粒乾爽唔油腻,镬气十足。甜品就系面包洒上上白糖以牛油煎成嘅焦糖多士,焦糖面脆得嚟又够香甜。
寿司吧
特上手握寿司御膳($450)
寿司吧由有超过四十年经验嘅大仓正孝师傅及何沛辉师傅主理,主打江户前厨师发办。呢个午市套餐就可以食匀时令手握寿司9件、面豉汤/稻庭乌冬、前菜、沙律、蒸蛋、甜品/咖啡/红茶。
手握寿司(食材因应季节而定)
寿司会用精选时令食材,例如拍摄呢日就有嚟自青森县嘅大拖罗,肥美鲜甜。赤鯥火炙後带出鱼油香,口感细腻。而寿司饭选用北海道七星米,粒粒分明、香软弹牙。
板神便当($480)
呢款豪华便当就最啱贪心嘅朋友,一套有齐前菜、季节沙律、蒸蛋、刺身4款、寿司4件、天妇罗、银鳕鱼西京烧、美国牛肉薄烧、面豉汤、甜品/咖啡/红茶。
刺身同寿司都相当新鲜,天妇罗面衣酥脆唔油腻,银鳕鱼西京烧嘅鱼油香同甜味平衡,美国牛肉薄烧加上炸蒜非常香口。
炭火烧区
炭火烧轻松时段套餐($238)
炭火烧区主打用纪州备长炭制作嘅串烧,备长炭少烟而且耐烧,最高可以烧到900度,快速锁住食材水分。而且有本地新鲜三黄鸡嘅各个部位选择,另一推介系呢个旗舰店限定嘅Happy Hour套餐,有5串备长炭串烧同日本清酒(300mL)。
备长炭串烧
串烧有日本黑豚肉、鸡翼、鸡肾、青椒仔、粟米,火候控制得宜,而且有淡淡炭火香。而清酒有4款选择:玉乃光 纯米大吟酿、玉乃光纯米吟酿94(串)、久保田千寿吟酿、极圣梦二旅情纯米吟酿,当中玉乃光纯米吟酿94(串)就系专门为配搭串烧而设计嘅!
清酒吧
品酒区
板神鉄板烧日本料理
地址:铜锣湾告士打道255-257号信和广场1楼103号舖
文:Cathy
相、片:Tom Li