大食仔几时都系食放题至抵。铜锣湾最近有间新晋嘅日本和牛放题餐厅,120分钟任食嘅唔净止系和牛烧肉,仲有一系列嘅和牛料理,CP值破表!
餐厅老板喺日本岩手县设有自家农场,养殖黑毛和牛。头半年以草喂饲,之後再用威士忌酒嘅hop去做饲料,令到牛肉肉色会红身啲靓仔啲。农场每月约可供应80-100只牛,当中有大约十零二十只会运送到港,所以有啲坊间少见嘅稀有部位,都可以喺度搵到,仲可以放题任食!
「尊贵日本和牛放题套餐」包括咗9-10款分别嚟自熊本、同岩手嘅A4/A5和牛烧肉(视乎供应情况),牛肩胛、牛颈脊、牛五花、牛小排、牛冧、稀有汁烧千本筋、牛肩梅花、後腰肉、牛肋条同埋一口和牛都有机会食到。餐厅首先会成set出嚟,试晒每个唔同部位後,就可以随意追加自己喜欢嘅部位。
牛小排
其中牛小排入口即溶,系最多人encore嘅部位之一。较少见嘅千本筋,系近牛𦟌位置,肉质较有弹性,配搭师傅特别调校嘅烧汁特别有肉香。
牛五花
牛五花油花丰富,烧完食啖啖油香。 而牛肩梅花则系前肩交界嘅位置,肉味浓郁。 锺意有嚼劲啲嘅朋友仔,牛颈脊同牛冧就应该系你哋嘅心水嘞。
除咗各款烧肉外,套餐仲包埋一系列嘅和牛料理。特别推介A5熊本黑毛和牛玉子烧,轻轻烧一烧和牛後,再蘸点日本蛋汁,蛋香满满得嚟,和牛仲要滑身咗。
飞驒牛刺身未食都睇得出新鲜,肉色鲜红,点一点特制酸汁更能突显肉香。不过如果怕太生嘅朋友,都可以轻轻焫一焫嘅。
黑松露烧牛肉他他以安格斯牛制作,底下置有调制过嘅腌洋葱、黑松露同葱花,一啖放入口,慢慢感受唔同层次嘅香味。
不得不提嘅仲有温泉蛋紫菜酱油牛川饭,呢个饭特别在於师傅自家提炼和牛油脂制作,令炒饭带有微微甘香味道。
原只龙虾刺身船提前两日预订可免费享用(优惠期至9月30日)
牛川日本和牛专门店
地址: 铜锣湾谢斐道496号金利文广场3楼
文:Kar
相、片:Wilfred Chui