扫街系唔少香港人都好喜爱嘅动作。未够钟食饭又扫一扫,食饱饱又要扫一扫,总之,行喺条街度见到一间间嘅小食店就会忍唔住,乜都想食!今次扫街热点嚟到深水埗,大家都知深水埗隐藏咗唔少平民美食。竞争激烈,性价比极高,最後有口福嘅⋯仲唔系我哋呢班食客?
近排,深水埗除咗有传统老字号小食店之外,亦有唔少比较新嘅小店进驻,每次去都包保有新嘢试!
极邪恶嘅「肥仔」嘢食 三肥美食
三肥美食,顾名思义系由三个肥仔一齐打理嘅小食店。卖嘅都系极邪恶嘅「肥仔」嘢食。听闻系首创嘅椒盐肠粉,简直系突破咗肠粉嘅潜能!肠粉外脆内软,肠粉炸完都保持嫩滑嘅质感,椒盐又够惹味。另外仲有咸蛋黄黄金鸡翼,外层嘅咸蛋黄份量够多,直头想拎嚟捞饭!
原味鸡蛋仔够简单 蛋香烘焙
图:Ben爷
呢间新开嘅鸡蛋仔专门店,开咗冇耐已经吸引到唔少人因为舖头阵蛋香而停低买返份嚟试!鸡蛋仔全部即叫即做,外脆内软,粒粒饱满,唔会全部空心位嚟。除咗经典原味之外仲有低脂芝士、绿茶同肉松等。仲有自家制薏米水、柠檬茶,食到drydry哋饮返枝就啱!
传统唐饼店小食 八仙饼家
食完港式食中式,八仙饼家系少数仲系前铺後工场嘅店舖,五十几年嚟一直供应传统唐饼。皮蛋酥系饼舖名物,内层有原个皮蛋系入面,仲有红姜同瓜子增加香味同口感,外层酥皮够松化(睇图应该feel到)。耐唔耐系要食吓呢啲唐饼先可以记住呢种咸香味~
台湾人珍奶小店 圆圆
介绍返间嘢饮畀大家keep住边食边饮先!虽然唔系咩过江龙,不过系由台湾人老板娘打理,而且饮过嘅都赞好。黑糖珍珠新鲜即制,杯底会feel到啲珍珠仲系暖暖哋,珍珠咬落烟韧Q弹,黑糖味劲香。个人觉得珍珠炭焙乌龙奶茶多份茶香,同黑糖嘅甜会平衡啲。
热辣辣街头串烧 标叔叔小食店
讲到扫街就梗系要食返啲一串串嘅嘢先有扫街feel㗎~牛肋肉、牛脷系牛魔王必叫之选,肉汁够,而且孜然粉重。Btw因为系即叫即烧,所以都要啲时间等㗎!另外花枝丸都劲受欢迎,烧到嗰外层脆身然後再加蜜糖,一啖即时解决咗想食BBQ烧丸嘅瘾。
日系软雪糕 华
扫到热热哋可以上西九凉住冷气继续扫。呢间「华」走日式风格,主打8.0特浓牛乳软雪糕,而且口味同款式都极多,喺得深水埗,价钱都算亲民。除咗软雪糕,仲有雪葩、smoothie同日本依家好兴嘅动物造型雪糕(好似BR雪糕嗰啲)。抹茶8.0盆栽嗰造型就够晒cute!
文:Yanny