好多人都锺意食辣,仲要愈辣愈刺激。尖沙咀最近新开咗一间正宗四川菜餐厅,打正旗号出「辣」招!厨师团队更曾去过四川考察,将当地嘅独家香料同酱汁带返嚟香港,炮制一道道红当当嘅火辣菜式。
四川辣椒有好多种,二荆条、青花椒、子弹头、鬼椒、四川生抽、豆瓣酱等等,每种嘅辣香同辣度都唔同,menu上嘅菜式,大部分都混合用多过一种辣椒去制作呢。未入到餐厅,喺门口就已经传嚟好大阵嘅麻辣香味喇。
蒜泥白肉
先介绍凉菜,蒜泥白肉望落系最唔辣嘅一道菜式,但都有加入自家制辣椒油、甜酱汁等制成酱汁,香口得嚟蒜味浓厚。啲蒜泥系自家制嘅,creamy到有少少似薯蓉。白肉仲卷住片青瓜,有助中和少少腻感。
(左)麻辣口水鸡、(右)夫妻肺片
麻辣口水鸡同夫妻肺片就开始嚟料喇。成碟都系红当当,好似好辣嘅样。但食落就会发现「吖你辣得咁mild嘅?」原来系师傅有就住大家嘅,小辣温和,自问好食得辣,或者一心想嚟挑战嘅朋友仔,可以试拣中辣或者大辣啦。讲返只麻辣口水鸡,辣椒油都分咗两层,上层系自家制嘅,下层以姜米、蒜蓉、四川生抽、四川辣椒粉、麻油同芝麻酱等调配而成,再喺面头洒上以青花椒磨成嘅粉,麻辣鲜香,鸡肉亦嫩滑。
干锅鲜田鸡
小炒方面亦有多款选择,推介干锅鲜田鸡,用上子弹椒、鬼椒、青红花椒、辣椒粉豆瓣酱去调配辣度。而以明火上枱,更能将洋葱等配菜嘅香味逼出嚟。不过,田鸡依然只系微辣,冇抢走到鲜味,肉质弹牙。
水煮桂花鱼
至於水煮桂花鱼当然系主角,满缸红中,除咗有一片片软腍入味嘅桂花鱼之外,另外仲有四川薯粉、四川鸭血、荀、大豆芽、青瓜等配菜。汤底辣汁以辣椒皇同二荆条打磨再加自家制辣酒爆香,各种配料索晒啲辣汁,先麻後辣,花椒味香。
麻辣五三五
地址:尖沙咀宝勒巷10号8楼
文、相、片:Kar