轩仔餐厅再出小王子下午茶 吸睛红色飞机蛋糕+棉花糖 兼送小王子公仔
2019-09-23

「能知道自己想要甚麽的人,真是幸运呢!」法国经典小说《小王子》讲嘅唔止系成长、爱情同爱情,仲有梦想!今次,张敬轩主理嘅法国餐厅正正就系以「梦想启航 Flying to My Dream」做主题,再度推出全新嘅靓靓小王子下午茶,食完仲有只特制嘅小王子figure可以拎返屋企添!


如果大家仲记得,佢哋上年嗰set下午茶,有朵好靓嘅玫瑰花!而今次讲梦想,当然就有架标志性极强嘅红色飞机啦。喺正式介绍之前,先睇下轩仔点样形容今次呢个下午茶餐先!

开饭仔畀咗几个题目轩仔,请佢分别以一首自己嘅歌、任何一句歌词,同埋一个朋友去形容下个set,轩仔谂咗阵,就畀咗以下呢几个答案出嚟,至於点解,就要大家自己领会下喇。

 题目:一首自己歌

 题目:任何一句歌词

 题目:一个朋友


采访当日,轩仔碰巧抱恙,把声降咗2 + n度,沙到一个点,但佢依然坚持要亲身介绍:「以往大家讲小王子,通常都系讲佢啲金句呀、玫瑰呀、爱呀咁,但小王子其实仲有个好重要嘅主题,系讲梦想。」


餐厅根据「飞行员梦想」嚟设计咗呢个鲜红色飞机造型嘅柚子海棉蛋糕,长条形嘅飞机,外层系丝绒质感嘅朱古力,内层就系微酸嘅柚子海棉蛋糕,而下面就系好似云彩一样嘅人工手做棉花糖。「呢个棉花糖,打卡时间得5分钟,同玫瑰嘅生命一样,系有时限性㗎。」至於蛋糕上面乘风飞翔嘅小王子,轩仔打趣话:「本嚟想做款食得嘅小王子嘅,但要扑爆佢个头先食呢又好似唔系咁好,最後我哋就设计咗呢款特制嘅figure,大家食完之後仲可以拎走。」(不过留意返,小王子figure数量有限,送完即止啊。)

 喺三层架上,最顶层嘅系三款充满住《小王子》元素嘅甜品


味道清甜嘅荔枝蕃石榴慕丝迷你泡芙,有顶小王冠,主体嘅红色象徵小王子嘅赤子之心,而轩仔更表示「我自己个人对蕃石榴系好情有独锺,佢嗰种粉红色,嗰种有渐变、层次嘅粉红色,其实都系象徵爱情嘅。」WOW~ 好浪漫~


粉蓝色星球造型嘅朱古力星球棒棒糖,有粒粒银色糖珠同星星,入面系朱古力慕丝同朱古力脆脆,一啖咬落去,脆皮中又有啲烟韧嘅口感,朱古力味香浓得嚟又唔会太甜。至於有片玫瑰花瓣喺面嘅蛋白柠檬挞,酸酸地咁感觉清新。


中间嗰层嘅Scone,除咗有原味之外,仲有款特别配合主题而制作嘅玫瑰松饼,以乾玫瑰同法国玫瑰花制作,配埋法国得奖名牌草莓、柑橘果酱,同皇室御用品牌Rodda's奶油忌廉,口感松化并带有阵阵花香。


而最底层嘅则系4款相对轻身啲嘅法式风味咸点,包括仙后芝士烟肉批、法式萝卜丝批配辣根酱、鱼子酱吞拿鱼他他配脆薯球,同埋皇帝蟹沙律配三文鱼子、青瓜及法国白芝士。

问到轩仔点解咁锺意小王子,佢首先表示好锺意小王子对爱嘅执着。另外,亦因为《小王子》系80年代少数能够合法传入到内地嘅儿童刊物,系佢细细个就接触到嘅童年读物。而且虽然呢本系一本儿童刊物,但讲嘅却系一啲好有意思、好深奥嘅成人故事,深入浅出,由小朋友到大人都啱睇。嗯,各位粉丝,想食就要快手卜位啦,轩仔话首卖当日嘅情况系仲快过佢演唱会嘅飞,5分钟就卖晒啦科科。


日期:10月12日起(逢星期六、日及公众假期供应)
时间:3:00pm - 5:30pm
价钱:HK$688 (2位用,另设加一服务费)
限量:每日20份 (接受30日内嘅网上预订


仙后餐厅
地址:湾仔皇后大道东213号胡忠大厦2楼


文:Kar
相、片:Cathy


关键字
张敬轩
下午茶
湾仔
法国菜
名人餐厅
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【随时更新】便利店寻宝 每周新品速报
2天前
【2019圣诞】早鸟优惠! 圣诞自助餐推介
4天前
【2019圣诞】年尾叉电 圣诞下午茶集合推介
2019-11-19
秋风起!5间大闸蟹放题食店集合
2019-11-19
【2019圣诞】约会之选 圣诞市集推介
7天前