康城新商场开业後，陆续有唔少餐厅进驻，今次到呢间全新嘅烤鸭品牌京沪佳肴！虽然系京沪菜馆，但餐厅风格就走年轻简约及时尚路线，仲设有户外坐位，天气凉凉地喺户外食中菜又几Chill～食物方面主打当然唔少得北京填鸭，选用北京金星填鸭，酥而不腻。亦有一系列招牌菜式包括黄金鸭件伴鱼子酱、金汤藤椒鱼片等，同场仲有调酒师即场冲制cocktails！

北京填鸭三食($598)

嚟得嘅北京填鸭一定系必食，想试吓唔同煮法，就可以试试北京填鸭三食。包括一份京沪酥香烤鸭、云吞鸭肉汤、京酱凉瓜炆鸭架或椒盐香酥鸭架，再配有饼皮及8款配料供包裹食用。

京沪酥香烤鸭选用北京白羽鸭，属於四系酥鸭种，不腥不骚。而制法一反传统采用西式嘅蒸烤风炉焖烤制作，严选饲养 60 日嘅雏鸭，制成净重 2kg 鸭胚。鸭坯需先喺零下 18 度嘅环境中冷冻一个星期，令皮下脂肪均匀凝结成块，上皮後放入晾鸭柜进行抽湿风乾排酸。长达 36 小时嘅熟成，令鸭胚减少水份，凝聚皮下脂肪。之後用230度高温烤制长达 70 分钟，令烤鸭皮酥脆而不油腻。

黄金鸭件伴鱼子酱($328/4)

酥脆厚身嘅烤鸭皮上放上满满鱼子酱，连埋双层薯片一齐食，一入口充满鸭油香，而清爽嘅青瓜及山楂酸味更有助中和油腻感，食多两件都无问题！

脆皮牛肋骨条($368)

超吸睛嘅牛肋骨条！牛肋骨肉质软腍，而带筋嘅部份有咬口，调味方面只加入少量辣粉等，唔会盖过肉嘅原味。

黑醋黄鱼($188)

平时食京沪菜黄鱼多以糖醋汁入馔，而呢度就选用黑醋，黄鱼炸得香脆外更开胃。

杨枝沙律虾球($208)

沙律虾球就食得多，杨枝沙律虾球加入柚子、蓝莓及士多啤梨等水果以及香甜嘅酱汁，味道又几清新。

金汤藤椒鱼片($248)、酸汤红薯粉肥牛($188)

另外当然唔少得近年好hit嘅酸汤鱼及牛喇～金汤藤椒鱼片利用藤椒独有味道，制成带点麻辣微酸嘅酸汤鱼片，而酸汤肥牛嘅牛肉片大片软腍，仲有烟韧嘅红薯粉食呀！

京沪佳肴

地址: 将军澳康城路1号The LOHAS3楼333号舖

文、相、片: Yanica