觀塘$298活海鮮+串燒放題優惠 燒蠔、凍蟹任你食
2019-04-18
想喪食新鮮海鮮但又唔想荷包大出血?觀塘商廈有間餐廳最近推出2小時活海鮮同串燒任食優惠,仲包每位食客一款主菜,價錢都只係$298。呢度地方寬敞,可以容納百幾人,仲有飛鏢機同桌球玩,超適合一大班朋友去聚餐!



任食海鮮供應時間係每日嘅夜晚6點至10點,有冰鎮海鮮、燒海鮮、串燒、沙律吧同甜品供應,飲品都係任飲,種類非常多。



任食海鮮種類包括凍蟹、皇冠螺、青口、凍海蝦。所有海鮮每日本地新鮮入貨,唔需要蘸汁都夠鮮甜。凍蟹肉質細嫩,又有蟹黃;青口、凍海蝦大大隻,非常肥美。



另外,餐廳仲提供即開愛爾蘭生蠔同韓國馬糞海膽,每隻$30,係成本價,真係抵食。愛爾蘭生蠔每隻都幾乎手板咁大,肥美唔腥。


燒海鮮方面有活蠔、黃扇貝、帶子、大蝦、貴妃蚌、黑蟶子等。餐廳有專人幫食客燒海鮮,燒製時加上自家調製醬汁,例如馬來西亞黑醬油、四川甜辣醬、香草汁、永牛城辣醬等,為海鮮帶嚟唔同風味。



串燒亦都係由專人燒製,有豬肉、牛肉、羊肉、腸仔、茄子、同各式蔬菜等。串燒燒製時會灑上餐廳自製甜辣粉,味道香濃,微甜帶辣,令串燒更惹味。


沙律吧、湯、甜品同飲品都係任食任飲,款式都幾多。食客加多$78仲有麥啤任飲。


任食優惠仲附送主菜,每位食客都可以任揀一款,款式包括意大利西西里茄醬扁意粉伴脆炸軟殼蟹、美國斧頭豬扒配玉米糕伴蘋果蓉黑醋醬、澳洲肉眼扒配野菌汁等,每款都好大份。




地址: 觀塘鴻圖道90號5樓


文:Kenna
相:Tom Li
关键字
放題
任食
海鮮
串燒
生蠔
海膽
燒海鮮
西餐
牛扒
觀塘
商廈
優惠
鴻圖道
飲食潮流
開飯仔為大家發掘香港這個美食之都的最新美食資訊,分享飲食潮流文化。
餐厅资料
本月热门
持續更新! 2024生日優惠 食盡歐亞各式料理
2024-07-02
【2024新店精選】6月更新! 嘆和風鰻魚飯、雞白湯拉麵
2024-06-18
【隨時更新】零食速報 每周新款零食、酒品點評
6天前
前五星級酒店烘焙主廚尖沙咀開店 推千層酸種蛋撻、牛角包
2024-06-26
壽喜燒推介2024!薈萃日本三大和牛關西壽喜燒、無限量食仙台A5霜降黑毛和牛
2024-06-18