西营盘新开台式Cafe 推介即煎铁板吐司/芋圆仙草/黑糖奶盖茶
2020-12-28

疫情下有假放都飞唔到去台湾,好在香港有唔少台式餐厅,例如西营盘呢间新店就主打台式饮品同轻食,有唔少人去台湾必食嘅蛋饼,早餐店常见嘅铁板吐司,同芋圆等甜品。装修风格清新自然,畀大家一个可以好好放松嘅空间。
 


eden位於西营盘港铁站附近,由三位年轻人主理,主打台式轻食,亦有All Day Breakfast、意粉等主菜。店名系引用《圣经》当中伊甸园嘅含义,希望可以打造一个静谧舒适嘅环境。饮品就同赏茶合作,由佢哋提供唔同种类嘅台式饮品。
 



台式铁板满汉综合吐司(早餐$51、午餐$56)

参考台湾早餐店,小店将当地嘅即叫即煎铁板吐司带过嚟西环,不过就改用松软又有牛油香嘅丹麦吐司!满汉综合口味即系鸡蛋、芝士、烟肉同火腿,炒蛋嫩滑,同有肉香嘅烟肉火腿都好夹。亮点之一系佢哋嘅沙律酱加咗蜜糖,甜甜哋配埋沙律菜可以解腻。
 


宝岛蛋饼(早餐$48、午餐$63)

蛋饼亦有芝士、燻鸡、肉松等多款口味,仲可以拣双拼(+$8)呀,开饭仔就试咗鲔鱼口味。值得一提系店主们特别选用一款特别嘅台湾蛋饼皮,食落口感酥脆又不失柔软,有啲似薄身版嘅葱油饼!
 


流心蛋烟三文鱼意大利面(午餐$91)

怕各位打工仔女食轻食唔够饱,亦有供应意粉方便大家嚟食Lunch。烟三文鱼有啖啖烟燻香气之余唔会死咸,仲食到鱼肉油脂香,捞埋酱汁同流心蛋嘅半熟蛋黄加倍香口。意粉亦煮得啱啱好,弹牙有咬口。
 

更多【新店直击】:
1. 日本蛋料理专门店大角咀全新旗舰店!海胆碎金枪鱼腩生鸡蛋拌饭+期间限定猫之全日早餐
2. 日本连锁烧肉店进驻荃湾开第二分店 大推薄烧澳洲M9和牛+日本霜降黑毛和牛
3. 大阪人气天然Shokupan专门店登陆尖沙咀 松软Shokupan +15款手工制果酱

 

红豆仙草芋圆($33)

提及台式甜品,点少得近年大热嘅芋圆!呢度一碗就有齐香甜红豆、烟韧芋圆同滑溜嘅仙草冻。最出色系仙草冻,软滑微甜感觉清爽。三色圆口感Q弹,地瓜圆同紫薯圆比较食得出食材原味,芋圆嘅芋头香味偏淡。胜在加埋红豆一齐食啱啱好,甜而不腻。
 


桂花水信玄饼(价钱待定)

晶莹剔透嘅水信玄饼系打卡之选,小店版本就加入带清新甜香嘅桂花乾,所以食落会有天然花香,口感软滑弹牙。配搭自家调配嘅柠檬蜜糖酱,酸甜清爽,做饭後甜品就最啱。
 


黑糖奶盖乌龙($30)

赏茶供应嘅台式饮品有好多唔同种类,特别推介呢款坊间少见嘅黑糖奶盖,用台湾黑糖制作,口感丰盈Creamy,而且喺黑糖奶盖面会再洒上一层黑糖,双重甜香。所以建议配搭清爽有回甘嘅乌龙茶底,降低甜度之余亦增加层次。
 




eden
地址:西环高街95A号地舖




文:Cathy
相、片:Calvin Kwok

关键字
西环
西营盘
蛋饼
铁板吐司
台式饮品
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
1天前
日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
2021-02-18
楚捻记新line!荃湾新开饺子店 必试黑松露什菌饺+香煎潮汕韭菜粿
2021-02-10
食肉兽必收藏!牛年到 五间品牛餐厅介绍返
2021-02-11
2021打卡大热!精选全港10间Pantone色系小店
2021-02-26