荃湾终於有Taproom! 旺角人气手工啤酒餐厅进驻南丰纱厂
2019-04-02

文青打卡最新嘅圣地之一——南丰纱厂,开幕以嚟陆陆续续有各式各样嘅餐厅进驻,好似之前同大家介绍过嘅4间特色café健康素食餐厅同老字号甜品等,最新开业嘅就有新界西朋友期待已久嘅Taproom呀,仲要系旺角人气Taproom嘅分店!啤迷注意!啡迷都可以注意,有咖啡饮的啊。

去过旺角店嘅beergeeks都会知道,佢哋嘅小食,好似炸鸡翼配腐乳酱呀、炸薯条呀同各式三文治都系佐酒神物,之但系就未必人人可以当正餐咁食……但要喺荃湾新店食正餐加饮酒一场过完全冇问题,事关增添嘅6款当店限定新菜式,都系以饱肚类嘅饭面为主呀。

首推好似沾面嘅海鲜沾意,师傅以日式高汤木鱼花汤做基底,加入周打汤同面豉制成沾意汤汁,亦有心思地将烘乾咗嘅乾瑶柱碎撒入意粉中,咸鲜味突出。

至於芝士控嘅首选就一定系羊奶杏鲍饭,食落就知道真功夫!用上羊奶芝士同巴马臣两款芝士制作㗎,你话芝士味香唔香浓嘞?羊奶味又够羶香喎,啖啖都好香口,如果怕太腻嘅话建议可选配果香味较重嘅手工啤酒或cider啊。

另一款意大利饭同样充满特色,系坊间少见嘅组合——马来肉骨饭。之系马来西亚肉骨茶味嘅意大利饭啊,每啖饭都系甜甜地,又同时渗出轻轻der药材味,仲有丝丝猪肉丝掺杂住喺中间,连埋香脆嘅烟肉一齐食,系几有风味嘅。

面豉金宝意同心内美牛肉意粉嘅感觉就相对较light少少,前者融入美国南部杂汤嘅意念,连埋蕃茄、青椒、秋葵等配菜,未食已经先闻到咸咸香香嘅烧面豉味,食落仲有啲喺後劲先爆发出嚟嘅辣味; 後者「心内美」其实系种味道清甜嘅紫红色萝卜,加埋牛肉、蒜头、冬菜一齐炒意粉,又几入味,啲意粉仲好弹牙添。

餐厅一向主打嘅三文治/面包都设计咗新款,包住喺硬身少少嘅法包入面嘅,系软腍又入味嘅手撕南乳炆猪肉,淋埋热溶车打芝士酱、放返几粒腌渍墨西哥辣椒,酸、辣、咸味集於一身,富层次感。

 (左起) 发花癫、Hunk Sir、Jeng

讲咗咁多嘢食,系时候要介绍返啲酒喇。呢度总共有21个tap头,正式开业後,将会按时令精选各款本地同外国嘅手工啤酒畀各位啤迷叹返够本。暂时on tap 嘅有少爷、hEROES同The Brew Commons嘅酒款。少爷Jeng坚系正,系款非常清爽嘅IPA,简单得嚟又带有强烈回甘;另一款清新嘅IPA系The Brew Commons嘅发花癫,仲要系single hop IPA,无论闻定饮都好香柑橘味;hEROES嘅Hunk Sir就完全系另一个方向,沉实稳重,微微嘅烘焙香中带有咖啡气息。

有别於旺角店嘅系呢间店仲有咖啡饮,啡迷同酒迷可以各取所需啦。餐厅同本地豆房Cotton mutton合作,选取佢哋嚟自印尼、埃塞俄比亚、台湾日月潭等地嘅浅炒豆泡制一杯杯嘅手冲咖啡、氮气咖啡或者espresso based嘅咖啡饮料,好似呢杯Estonic 咁,就系Espresso 加tonic water嘅成品喇。

不得不提嘅系,餐厅仲有两部街机,有过百款游戏,重点系客人可以免费!任打!是咪happy先?


TAP The Ale Project
地址:荃湾白田坝街45号南丰纱厂5厂3楼302号舖
正式开业日期:4月4日

文、相、片:Kar


关键字
荃湾
打卡
手工啤酒
人气
芝士
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】便利店寻宝 每周新品速报
1天前
【2019圣诞】早鸟优惠! 圣诞自助餐推介
3天前
【2019圣诞】年尾叉电 圣诞下午茶集合推介
2019-11-19
秋风起!5间大闸蟹放题食店集合
2019-11-19
【2019圣诞】约会之选 圣诞市集推介
6天前