坐喺海边食海鲜叹啤酒,都唔一定系飞去外国先做到嘅。点样可以留喺香港都有外国放假feel?去尖东啦~ 艺术馆重开後,海滨长廊上新开咗一间露天餐厅,有多款海鲜同小食,仲有自家制特色雪糕同多款手工啤酒,够晒chill!
呢间餐厅采用Grab'n'Go形式,落单後自行取餐,然後就可以随便喺海旁或用餐区度享用,享受住暖和嘅日光,吹住海风,再望住个海,心情都轻松啲。
餐厅特别选用可持续性海鲜,食都食得够环保。人多就就梗系嗌拼盘share最开心啦~ 海鲜拼盘好丰富,有澳洲生蚝又有以香草微煎过虎虾,仲有青咖喱纽西兰青口、天妇罗八爪鱼丸等,啲海鲜全部都好鲜甜,八爪鱼丸中仲坚系有大大粒八爪鱼,外脆内爽!
另一个小食拼盘同样吸引,特别要提下长条形嘅炸物,就咁睇系估唔到里面卖咩药,一切开,啊!有好多粒生蚝呀!原来系咖喱生蚝冬甩,好有惊喜。
附近嘅打工一族,lunch嚟食返碗七彩嘅八爪鱼poke bowl刺身饭都系一个唔错嘅选择,铺满黄萝卜、红心萝卜同大豆等,相当健康,加埋五香粉就更加香口。
搽上泡菜酱嘅自家制面包,再夹住一嚿嚿龙虾肉,呢个小龙虾包相当有特色,龙虾肉鲜爽中又带有微辣,好开胃。
话明要chill梗系要有返杯酒啦~ 呢度有多个tap头,供应本地品牌鬼佬手工啤酒,pale ale、ipa等各款口味都有,仲有鬼佬最新出嘅gin & tonic添~
最後整多杯雪糕就perfect池喇。每日轮流供应6款以澳洲牛奶自家制作嘅特别口味雪糕,杯装又得,cone又得,口感软滑,不过就溶得好快,要打卡嘅朋友就要快手喇。最受欢迎嘅系海盐焦糖花生酱味,甜甜der仲有机会咬到粒粒花生添~ 红桑子奶茶味则甜中带酸。但最特别嘅一定系云呢嗱八角味,八角味真心突出,辣辣地咁好过瘾,如果撞啱你去嗰日有呢款味,记得试下。
(左)白脱牛奶炸鸡脾配茄子多谷饭、(右)天妇罗软壳蟹配芝麻辣酱乌冬沙律
Ink
地址:尖沙咀梳士巴利道10号香港艺术馆地下
文、相、片:Kar