曾几何时,马鞍山人一直都活喺荒漠之中,就连开间吉野家都畀大家视为珍而重之嘅绿洲,当年仲曾有马鞍山人扬言话要日日食吉野家。不过嚟到2019年中,「美食荒漠」之名终於成为过去喇,近期有唔少餐厅入咗去落脚,等大家唔使跨区都可以enjoy到美食,仲有唔少系小店同特色菜系嘅餐厅添~
亲民价叹高质Shabu Shabu しゃぶしゃぶ四季
(左)八爪鱼烧饼($22),(右)芝士年糕($38)
之前喺铜锣湾开Pop-up店,最近终於正式登陆香港!Menu选择亦更多元化,例如多咗一系列日式前菜。八爪鱼烧饼味道同口感都似章鱼烧,不过就用竹签串起更方便享用;芝士年糕就用麻糬包住芝士,炸过後外脆内流心!
(午市套餐)上选鸡腿肉涮涮锅($78/位)
想食得抵啲嘅话,当然要拣啱午市或者下午茶时段去食Set,好似呢个上选鸡腿肉涮涮锅系一人前午间定食,包埋日本野菜盛合及乌冬或饭。而且仲有多款汤底选择,好似柚子盐汤(+$10)就比较清爽,夏天配鸡肉够开胃又唔腻。
鹿儿岛A4黑毛和牛西冷寿喜烧($298/位)
呢度亦有多款高质食材,包括日本和牛、松叶蟹、鹿儿岛元气鸡、西班牙黑毛猪等等。呢个鹿儿岛A4黑毛和牛西冷就最啱锺意和牛入口即溶口感嘅朋友仔,脂肪分布均匀,用甜嘅寿喜烧汤底煮至半熟,再沾上生鸡蛋汁,入口肉质软嫩,牛香同鲜味浓郁。
台湾珍珠奶茶始祖 春水堂
(左)爱玉铁观音柠檬茶($32),(右)珍珠红豆鲜奶茶($35)
1983年喺台中创立,系创造出第一杯台式珍珠奶茶嘅饮品店。马鞍山店地方唔大,不过亦设有少量座位。爱玉铁观音柠檬茶系特别推介之一,爱玉冻同茶叶都从台湾运过嚟。珍珠珍珠更加系都跟返元祖做法,从台中总店送到香港,口感Q弹配埋粒粒红豆好有咬口。
黄金香酥鸡($48)
除咗饮品,呢度亦有小食同甜品供应,黄金香酥鸡有啲似香港人食开嘅盐酥鸡,外面炸至金黄酥脆,加上胡椒盐调味,唔会太咸又够惹味。
花生小麻吉($38,12:00-20:00供应)
麻吉即系麻糬,Q弹黑糖麻糬夹住保留粒粒口感嘅花生馅,口感丰富。而且花生嘅香味同黑糖甜味又夹得好,配甜度较低嘅茶饮一流。
多款选择西日Cafe L.D.K. by Ufufu Café
极上鳗鱼煎蛋汉堡($148,期间限定供应)
呢间Cafe主打日式西餐,打开Menu真系有唔少选择,加上不时推出期间限定菜式,好似最近嘅和式风味汉堡及果昔(期间限定供应至9月)咁,当中最吸引嘅一定系呢个极上鳗鱼煎蛋汉堡,原条鳗鱼相当厚身,再加上煎至半熟嘅日本福冈产鸡蛋,好吸引!
经典A4和牛汉堡($98,期间限定供应)
牛肉汉堡亦选用A4和牛,肉扒保留到肉汁而且牛香浓郁,配埋香口薯条同沙律,够晒满足。同一系列仲有日式火山烧肉汉堡($78)、双重芝士熔岩和牛汉堡($108)同豆腐沙律炸鸡汉堡($88)。
芒果寒天果昔($48,期间限定供应)
夏日天时暑热最啱叹返杯冻冰冰嘅鲜果特饮,呢杯芒果寒天果昔用芒果打成Smoothie,配搭透明爽口嘅寒天,透心凉得嚟卖相仲好啱打卡!
惹味叻沙 峇峇娘惹
有几间分店嘅「峇峇娘惹」,睇个名都知,梗系主打叻沙、肉骨茶、咖央多等嘅地道星马菜式啦!呢度嘅出品都系用东南亚出产嘅食材同香料。叻沙掺掺,汤底重椰奶同虾米香,唔会太辣。掺掺混合咗油面同米粉,一个挂汤能力强,一个保留口感,而且豆卜同啲掺掺都吸收晒汤汁。另外再加杯即叫即冲嘅马来拉茶,泡沫丰厚,奶味浓!
性价比高池畔西餐厅 Puzzle Dining
喺马鞍山游泳池旁嘅西日fusion菜餐厅。环境阔落,对住个泳池景都几舒服。日头嚟可以食件牛角包,叹杯咖啡咁。午餐想食饭嘅话,最吸引嘅一定系呢碗自家制黑豚肉叉烧配日本煎蛋饭,香口得嚟唔觉油腻!而夜晚除咗西式扒餐之外,呢度仲有串烧食,最多人叫嘅系烧白鳝,望落都觉得劲juicy。同时兼有酒水供应,可以边食串烧边啤啤佢!
台湾品牌红烧牛肉面 新东王
原来呢间餐厅系由台湾新北市起家,已经有几十年历史嘅老字号嚟!今次喺香港开店,就主打台湾红烧牛肉面!有唔少用料都系台湾材料、台湾预制。牛骨汤底,加上软腍嘅牛肉同牛筋,牛魔王就啱晒了!而且面条爽滑。Menu除咗有主打嘅牛肉面之外,仲有好多经典台式小食,可以畀你自由加配添。
抵食饺子屋 尚月饺子汤面专门店
成日好羡慕出面咁多饺子屋但又冇马鞍山份?梗系唔系啦~呢间饺子舖价钱亲民,全部饺子都系店内即制即包,馅料足,煎饺肉汁多。嚐辣人士可以拣韩式口味,辣酱微辛够惹味。饿底一族当然就要碗饺子配面底啦,包保够饱。
泰式串烧美食 Thai Krub
虽然选择唔系话特别多,但胜在价钱抵,而且住系喺富安嘅街坊落街行两步就到。想食串烧叉叉电变得方便快捷,想豪啲仲有烧蚝、烧海鲜!泰菜必有嘅Pad Thai、冬阴功同炒通菜都齐。
文:Yanny