经典扒房中环新址重开 即席分切招牌特级烧牛肉 银色餐车再现
2019-06-04

各位肉食兽同牛魔王,对嚟自美国加州嘅经典扒房Lawry’s The Prime Rib一定唔会陌生,自从早几个月位於和记大厦嘅旧店,因为大厦要拆卸重建而被迫结业後,日等夜等终於等到佢哋搵到新舖位,重新再营业喇!经典银色餐车不变、即席切肉不变、切肉方法不变、大家可以去食返老味道啦。

新址位於中环嘉轩大厦顶楼,使用落地玻璃窗设计,有自然光透入,较以往环境光猛。圆拱形天花、酒红色嘅座位,感觉高贵优雅,另有一间10人VIP房。

推住架600磅嘅银色不锈钢餐车去到客人面前,即席分切牛肉,绝对系呢度嘅经典同指定动作。望住order嘅烧牛肉,一片一片咁切落嚟、淋埋汁再上枱,眼球先被喂饱。餐厅一直坚持使用获美国农业部USDA认可、以粟米饲养嘅美国黑安格斯牛肉,大大块但肉质依然软腍而带有肉香,相当juicy,边边位仲有微焦,系熟悉嘅味道,牛魔王表示满足。

套餐仲配埋香滑薯蓉、英式烤薄酥饼(Yorkshire Pudding)同忌廉辣根酱,加钱仲可以加埋忌廉粟米粒同忌廉菠菜等。摩擦力强嘅朋友仔,应该会见得到碟上嘅牛肉汁同薯蓉上嘅汁系有啲唔同。前者以牛骨、杂菜等熬制,加入砵酒,令汁酱更香,点牛肉同Yorkshire Pudding都系一流;後者较杰身,加入红酒制作,食落仲有阵阵牛肉香,配薯蓉食令到层次更为丰富,啖啖牛香。

同以往一样,餐厅提供4种席前分切方法,分别系份量最细嘅加州薄切(对女生嚟讲都已经唔算细)、英式三片切、招牌美味切,同埋重量级16安士金百帝厚切。

当然,嚟到唔止净系得牛食嘅,羊都有。仲有汤品、沙律、甜品同各款酒类饮品等。烧幼嫩羊架羶味唔算好重,点埋红酒汁更能带出肉香。

以美国龙虾尾、洋葱、甘笋等熬制8个钟嘅龙虾浓汤,聚集晒各项食材嘅精华,成碗汤煲得好融啊!啖啖都系香浓嘅龙虾味,嚿龙虾肉仲好鲜爽添~ 饮完仲有阵余香喺口腔中回荡。

冰旋翡翠沙律同样充满视觉效果,侍应会即场喺碎冰上调制沙律,一路转盘,一路加入自家品牌些利酒沙律酱,确保酱料渗透匀循之外,每片蔬菜都仲可以保持喺最冰冻最新鲜嘅状态。上碟时,仲有多只冰叉奉上,一食,wow,好有冰感,新鲜爽脆,夏天食就更加爽。加埋餐厅自家调制嘅pepper都得。

虽然食咗好多肉、好多嘢已经好饱,但依然都要留啲空间畀甜品,第二个胃嚟的嘛,有位嘅。暖朱古力蛋糕配云呢嗱意式雪糕,望到啲好鬼澎湃嘅朱古力酱,甜魔立马变心心眼。一个字,甜香!蛋糕非常软熟湿润 ,带有微暖温度,要尽情咁点多啲朱古力酱一齐食先至得!


Lawry’s The Prime Rib
地址:中环皇后大道中9号嘉轩广场3楼


文:Kar
相、片:Tom Li


关键字
中环
扒房
老店
牛肉
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】便利店寻宝 每周新品速报
6天前
RubberBand成员开石烧牛扒专门店 8款靓牛+自家调制鲜甜烧汁 最平$80
2019-06-18
炎夏感bye-bye!6至7月下午茶推介
2019-06-24
6月份好评餐厅十强
2019-07-04
美食荒漠不再 马鞍山8间新餐厅推介
2019-07-02