每逢粮尾都好不知所措，唔知食咩个荷包先唔会痛呢？今次开饭仔就嚟到湾仔，带各位湾仔打工仔食好西之余，又唔使怕伤害到个荷包！粮尾啫，又有咩好怕喎~
饺咁多口味 北方饺子源
图﹕呢间饺子店屹立湾仔十几年，可以话系湾仔打工仔饭堂呀！佢哋嘅水饺面40蚊左右就有交易，选择超过10种，蒸饺又有煎饺又有，皮薄馅足，清清地有白菜猪肉饺面、翠玉瓜猪肉饺面，想有特色啲就不妨试下京葱羊肉饺面，唔会太羶，适合香港人嘅口味！
良心香港面食 富记面家
图﹕花太郎
喺呢间面店就可以食到最普通，但又买少见少嘅香港味啦，好似墨丸河、牛腩河、紫菜四宝河等等。碗碗嘅份量都好多下。自家手打墨丸足料又弹牙。特别推介牛盛荟河，一碗有齐牛肚、牛丸、牛筋同牛腩，煮得入味而且够晒腍！
大大件烧味 大庆烧味饭店
图﹕呢间烧味店胜在价钱公道，烧味又够足料，大大件，完全唔欺场。必食叉烧呀，口感软腍，肥瘦适中~ 嗌个叉烧饭、叉鸡饭，都系50蚊有找，而且就算系男人都一定可以食饱！
平民港式汉堡 乐景快餐店
图﹕边个话粮尾食汉堡包，就一定要去M记呀？呢间细细间嘅小食店，位唔多，但选择就够晒多！粉面饭$30零蚊咋都系，汉堡包仲抵，10几蚊就食到个！而且仲要系即叫即做喎，烘过嘅面包带有微脆口感，手剁汉堡扒口感厚实，仲好juicy，绝对系粮尾天堂！芝士控记住要拣芝士蛋汉堡喇，块芝士半溶的啊。
热辣辣咖喱 新景园咖喱小厨
图﹕湾仔区食饭不嬲都唔平，呢度午市饭盒50蚊有找，仲要大大盒，饭多餸多都算系咁啦。呢度特别出名系食咖喱，咖喱汁微辣但又带点香甜，捞饭食一流！咖喱汁系另上嘅，自己锺意淋几多就淋几多啦，反正就系惹味开胃。特别推介咖喱猪扒饭，猪扒炸得酥脆，浸晒落咖喱度，都唔会觉腍呀！
文﹕Kiko
