粮尾打气!5间尖沙咀平价饭堂推介
2019-06-24
「平时夜晚食好西、饮嘢就话约人去尖咀啫,而且又系游客区,一定冇平靓正嘅嘢食啦~」不过,尖沙咀嘅打工仔又唔使咁绝望嘅,就算系粮尾都唔使感到孤单,皆因喺尖咀都有唔少平价美食收收埋埋咋,而lunch放饭嘅平价选择就仲多!

抵食高质汉堡小店 嘉宝汉堡
成日有个错觉,喺香港地要食个过百蚊嘅汉堡先叫有返啲质素,但原来尖沙咀嘅呢间汉堡小店就打破咗「靓汉堡,高定价」嘅定理,提供性价比超高嘅高质汉堡。店内猪、 牛、羊、鸡同虾都有齐,十几款都各有特色,就好似烤布利芝士、黑松露之类,大约$40-50左右,套餐小食都系加多十几蚊,而且薯条部份仲见到连住薯皮,口感厚实,有薯味,仲系即叫即炸㗎!

花多眼乱刁钻车仔餸 靓靓 不一样的车仔面
标榜全店食物不加味精,炸物油每日更换,汤头呷两啖都唔口渴。而且呢度无论系汤底、面底定车仔面餸,都不时都会有新菜式,选择真心花多眼乱。特别介绍黑毛猪叉烧,肉质结实、蜜汁够多,酒槽豆腐,坊间少见。仲有唔少得意小食,例如连分子料理,黑鱼子酱提子包都有得食,简直就系精致版车仔面店。

平价大份西餐 I Café
呢度嘅嘢食份量十足,lunch set最平四十零蚊,午餐会经常换款。喺尖沙咀地段,但价钱亲民,加上质素唔差,所以都几多人食。大食一族叫个邪恶特浓芝士鲜茄焗猪扒意粉就最啱,芝士多,猪扒够大块!OL或者keep fit人士就可以拣啲轻食嘅bakery food、沙律咁,都系三四十蚊。而且仲有唔少人话呢度嘅咖啡亦有水准,latte仲有拉花㗎!

怀旧碟头饭 光荣冰室
呢间港式怀旧冰室,虽然夜晚嘅煲仔饭几出名下,但都惊粮尾紧嘅大家唔舍得食$70蚊嘅煲仔饭,咁就介绍返lunch先啦~月头先去食煲仔饭!话说呢度嘅快餐都系$50左右,而且味道一啲都唔颓。秘制酱油叉烧煎蛋饭,流心煎蛋,加上叉烧份量多,加埋豉油捞白饭,正!另外葱油鸡扒饭都好正,鸡扒一啲都唔鞋,葱油仲系捞饭神器添。

必食洋葱猪肉饺 阿芳上海馄饨
温馨提示,想极端地悭钱嘅话等到下午茶仲抵!呢间餐厅专做饺子、上海小食同面食。而最多人叫嘅就系洋葱猪肉饺。推介汤饺,因为个上汤底几甜,仲有少量樱花虾提鲜。细食嘅人可以选择轻食套餐,细份啲价钱亦平啲。饺子可以配面、配年糕,仲可以加钱配小食,例如拍青瓜、四喜烤麸、蒜泥白肉等。

文:Yanny

关键字
尖沙咀
汉堡
车仔面
冰室
饺子
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
1天前
食豪啲啲 城中5间海鲜+肉扒父亲节自助餐
2020-06-10
至甜初夏 6月下午茶推介
2020-06-15
湾仔新扒房只卖$298黑安格斯牛扒套餐 任食薯条+超松软肉桂牛油餐包
2020-06-11
甜蜜蜜暑假 7月下午茶推介
7天前