意大利菜多数都系由面粉制作，好似一谂起意大利就会谂起嘅意粉、薄饼、面包等都系。而喺尖沙咀新开嘅一间意大利菜餐厅，就由曾经连续廿年荣获米芝莲名衔嘅星级厨亲自坐镇，佢更特别挑选多款唔同嘅面粉制作唔同嘅菜式，将正宗传统意大利人嘅家庭味道带畀食客。

 经典龙虾扁意粉

先讲下意大利粉。餐厅每日新鲜制作意粉，选用属於00 面粉嘅Petra 7220面粉，呢只粉吸水力高，而且带有小麦香。推介试下经典龙虾扁意粉，以橄榄油同番茄煮好酱汁後，再放入新鲜龙虾一齐炒，最後加入自家手作扁意粉。意粉挂汁力高，吸晒啲龙虾汁，口感烟韧，啖啖浓香。

 金芝肉腌薄饼

而Pizza则选用咗另一只面粉——由意大利入口嘅Petra 3石磨面粉。呢只系一只专门用嚟做pizza嘅面粉，做出嚟嘅面团稳定性高，面筋有弹性。星级意籍大厨坚持喺店内自家培植酸面种，将Petra 3石磨面粉，加埋水、苹果皮、蜜糖同砂糖等嚟起种，成熟到变成天然酵母之後，就将酸面种混入Petra 3石磨面粉，搓成酸面团发酵24-48个钟，再拎去焗。就咁听都觉得会唔会太多功夫啊师傅？不过为咗真‧地道嘅口感，心机总不可少。餐厅供应多款pizza，讲到最吸睛嘅就一定系金芝肉腌薄饼，中间个金色波波劲sharp醒，原来系以金箔舖满晒喺Burrata芝士面呀，配埋咸咸香香嘅腌三文鱼肉，饼底口感柔韧。

 海鲜薄片墨汁炖饭

餐厅亦有一系列创作菜式，黑麻麻嘅海鲜薄片墨汁炖饭就系其中之一。特意选用嚟自意大利北部、风乾熟成一年嘅Acquarello米，呢种米非常有咬口，吸水力又够高，煮出嚟嘅意大利炖饭都会香浓啲。大厨先喺锅上将米烘热，再加入白酒、鱼汤同新鲜墨汁煮香，唔使加牛油同忌廉，risotto都可以好creamy。加埋多款插面嘅海鲜，系几吸引嘅，但味道就略为咸咗少少喇。

 经典肉丸配蕃茄酱依然大厨家乡做法制作，肉丸腍身，酱汁蕃茄味浓郁。

 甜品嘅话，点少得经典嘅Tiramisu？呢个千层Tiramisu杯，香甜软滑，咖啡香味突出。

 秘制渍香吞拿鱼牛角包

顺带一提，餐厅门口有个Grab & Go counter，供应多款自家制烘焙美食，包括外层松脆、层次分明嘅经典自家制牛角包，同秘制渍香吞拿鱼牛角包等。

Da Filippo Trattoria
地址：尖沙咀广东道21号海港城港威商场3楼3203-3204A号舖

文：Kar
相、片：Tom Li