米芝莲一星拉面进驻尖沙咀 新店限定味噌拉面(有片)
2017-09-23

喺【过江龙登陆!海港城3大新店预告】提及过,日本首间获得米芝莲星级肯定嘅拉面店终於嚟到尖沙咀开香港第二分店,推出新店限定嘅味噌拉面,用正宗德岛县八丁味噌配合熬煮接近九个钟嘅高汤,同酱油或者盐味拉面最大嘅分别喺边度?即睇开饭仔率先试食报告!
 

「茑」(Tsuta) 今次选址於尖沙咀海港城港威商场地舖,虽然无咗部拉面机,但炉头就多咗一组,座位亦由铜锣湾店嘅21个增加至新店嘅35个。而餐牌方面就增加咗尖沙咀店限定嘅味噌拉面同两款小皿 (Side Dishes)。
 

味噌拉面用嘅面条一样糅合荞麦粉及三种唔同面粉,但比酱油或者盐味拉面用嘅较为粗身。皆因味噌味道较浓,用比较粗身嘅面条就唔会发生比汤底味道盖过面条味道嘅情况。
 

而味噌拉面嘅配料亦有唔同,为咗配合咸香嘅味噌,配料都系味道比较清淡嘅粟米、芽菜同西洋菜。而特别酱料就系自家制嘅辣酱。叉烧、味玉就可以按自己喜好选择要唔要追加。
 

味噌味玉叉烧拉面一上枱就闻得到味噌独特经过发酵嘅味道,汤底饮落的确系比另外两款口味更咸,适合钟意偏重口味嘅拉面迷。虽然睇落好似几多油,但唔会有油腻嘅感觉。
 

以八丁味噌再加上牛肝菌蘑菇油,就比较难饮到原本以全鸡、海蚬、鱼乾同蔬菜等每日熬煮近九小时嘅高汤原味。所以开饭仔嘅建议系钟意淡雅系嘅话可以点盐味拉面,想浓少少或者想食到黑松露香味嘅就点酱油拉面,而喜欢浓郁汤底嘅当然就要点味噌拉面。
 

更多【新店直击】:
1. 独霸270°海景!米兰意菜新店3大睇头
2. 麻瓜们集合!旺角魔法主题Cafe新登场(有片)
3. 温哥华过江龙 人气法式Crepe专门店刚登陆 招牌款式抢先试(有片)


面条粗幼适中,同汤底味道平衡。配料方面,辣油嘅辣度适中,唔会抢去味噌咸香又做到点缀同增加味道层次嘅作用。粟米同芽菜嘅清甜可以减低味噌腻度。叉烧亦系一贯嘅高水准,口感柔嫩有脂香而唔会觉得肥腻。
 

不过今次开饭仔食到嘅味玉就有少少失准,流心程度唔及之前喺铜锣湾店食到嘅吸引。不过蛋香依然浓郁,补返数啦。
 

而尖沙咀店新增嘅两款Side Dishes炙烧骰子肉同烧烤梅花肉,其实系将尖沙咀都有嘅炙烧骰子丼同烧烤梅花丼「走饭」,最啱「食肉兽」加点。炙烧骰子肉用火枪烧至微脆,入口先食到洋葱酱香味之後再到肉味。不过因为用嘅系比较瘦嘅猪肉,部分无肥膏嘅肉粒就略嫌太乾。
 

尖沙咀将会喺听日(24/9)朝早11点正式开幕,以後新界同九龙嘅拉面迷唔洗过海都食到米芝莲星级拉面喇。
 



茑 Tsuta
尖沙咀广东道17号海港城港威商场地下G111号舖



文、相、片:Cathy

关键字
拉面
东京米芝莲
味噌拉面
尖沙咀
海港城
日本菜
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
6天前
【2021生日优惠】持续更新!6月寿星送海鲜拼盘
2021-06-01
《优秀开饭热店大赏2021》赛果公布
2021-05-24
5月份好评餐厅十强
2021-06-04
一秒变出 招牌十八层海胆杯 佐敦小店全新体验 魔术X铁板烧
2021-06-11