香港人鐘意任食是常識吧，無論係放題或者自助餐都總有唔少支持者。不過，如果你以為香港地有得任食甜品、火鍋，同點心已經夠厲害嘅話，少年你太年輕了！其實連牛扒、Pizza、小籠包、榴槤甚至米線都可以任食！
荃灣75分鐘任食湯粉 蜜糖吉蒂
米線都搞放題？係，你無睇錯，開飯仔都無打錯！呢間茶餐廳最近推出特色湯粉放題，可以任食江西米線、紅薯粉或者桂林米粉加四款餸，而且湯底有得揀特別嘅香辣石螺湯，當然亦有大路嘅酸辣、麻辣同清雞湯。不過無得叫淨餸，食完一碗先可以落單叫下一碗，抵唔抵就見仁見智喇。
任食供應時間：星期一至六14:30-21:00
灣仔90分鐘任食牛扒 紫丹亭後街牛扒
平日想食牛扒都要就住就住？呢間扒房就有90分鐘放題畀各位任食！雖然只有新西蘭西冷一款選擇，不過勝在無將貨就價，牛扒分量夠大而且有牛味。不過偶然會有筋位較多，或者與Order嘅熟度爭少少嘅問題，不過任食嚟講收貨有餘。加埋薯菜亦係免費任食，實夠飽肚啦。
任食供應時間：星期一至五14:00-15:30，18:00-22:00；星期六11:00-16:00，18:00-22:00
*必須訂座
灣仔75分鐘任食牛扒豬扒 知味屋
圖：klee0322
無獨有偶，灣仔呢間西餐廳都做放題，而且仲係西冷牛扒加英式豬扒任食！勝在無論牛扒定豬扒都唔會太薄，仲Keep到肉汁。而且連埋餐湯、沙律同包。雖然晚市得75分鐘就略嫌比較趕，而且味道同快餐店出品差唔多無乜驚喜。亦有食客讃上菜速度幾快，不過就要留意每輪Last Order時間喇。
任食供應時間：星期一至日17:45/19:15/20:45
灣仔120分鐘任食上海菜 上海佬蟹莊
圖：amy0802
有得任食小籠包大家會唔會覺得爽歪歪？呢家上海菜館8月推出放題到而家繼續做緊，比起以上任食，呢間嘅選擇明顯多好多：冷盤、湯、主菜點心、飯麵同甜品等全部都有，而且時間亦唔趕。但有讃亦有彈，有食客試完覺得水準一般，最期待嘅灌湯小籠包食落竟然覺得乾，睇嚟調製一下期望比較好喇。
任食供應時間：星期六、日及公眾假期 11:30-15:00
港島150分鐘任食Pizza小食 Jacomax
圖：Rasw
大胃王最愛！呢間喺上環、灣仔同鰂魚涌都有分店嘅意大利菜館10月推出嘅Pizza Buffet一樣繼續進行中，任食包括五款口味Pizza，而且口味有鹹有甜，間住嚟食無咁快膩（好似係）。另外仲有香腸拼盤、薯角同沙律，一樣任食。有食客大讚薄身Pizza夠煙韌，反而腸仔就麻麻。留Quota慢慢嘆Pizza好過！
任食供應時間：星期一至五14:45-17:15
荔枝角90分鐘任食雞翼 The Hub
圖：為食達
事先聲明，呢間餐廳嘅雞翼放題係不定期舉行，而且一出就好快畀各大雞翼Fans Book哂位，各位真係想試嘅話記得留意住佢地Facebook。講返正題，呢間樓上Cafe嘅雞翼派對每次都會有12款唔同口味雞翼畀大家任食，有時仲會有第13款特別新口味，總算有啲新鮮感。不過唔少口味嘅醬汁都唔太入味，要扣分。另外沙律、飯麵同湯都係任食。
任食供應時間：指定日期 11:30/13:00/14:30/16:00
期間限定90分鐘任食榴槤 榴槤BB
壓軸重口味！呢間公司不定期會舉辦兩小時嘅任食榴槤品鑑 Party，唔單止可以一次過試到好幾款唔同品種嘅即開榴槤肉，最值得一讃嘅係兩小時裡面頭30分鐘係專人講解同試食，之後90分鐘就係任食時間。嚟緊2017年1月21號會有一場9種馬來西亞榴槤放題，大家準備好迎接呢場可能係世界上最臭嘅放題未？
任食供應時間：不定，可留意網站或Facebook公佈
*只接受預訂門票
開飯編輯推介：
1. 【專訪】有故事的Man 手紋母親心電圖 以上門私房菜延續愛
2. 11月份好評餐廳十強
熱門文章推介：
3. 精選芋圓甜品舖PK戰
隨時接收最新資訊
讚好OpenRice專頁！