盛夏Take个break 7-8月下午茶推介
2019-07-16

下午茶好似有种治癒嘅魔力,有时几攰几辛苦都好,同闺蜜或者一班friend去食返个tea,抖返两三个钟,又好似叉返电咁。今个盛夏,呢几间酒店都推出咗啲特色主题嘅下午茶,有蜜瓜有绿茶,仲有间可以任食Movenpick雪糕添!

日式梳乎厘下午茶   港威酒店  Three on Canton 

尖沙咀呢个下午茶,两个重点:大众飞佛嘅梳乎厘班戟、两个钟无限任食6款Movenpick雪糕!梳乎厘班戟用上法式面粉同日本鸡蛋制作,质感绵密松软,空气感适中,蛋香味十足,建议试咗几啖原味之後可以淋埋自家制抹茶酱。至於6款Movenpick,分别有口味包括意大利奶冻、瑞士朱古力、云呢嗱、士多啤梨、特浓咖啡同枫糖核桃,大家可以去雪柜一盒一盒咁随便拎嚟食!好鬼抵,饮品方面,花茶、咖啡以外,想要cocktail或mocktail都得啊。

日式梳乎厘下午茶
价钱:$528(2位) / $388(1位)
供应日期及时间:即日起,每日3-5pm

绿茶下午茶自助餐   帝苑酒店 雅苑座

绿茶迷mark低啦,成个下午茶buffet都系以绿茶甜品做主题呀,有部分仲系新出嘅添,好似使用日本宇治抹茶粉制作嘅绿茶玛德莲,口感松软;绿茶果冻配杏仁慕丝感觉清爽;绿茶荟萃则有顺滑嘅绿茶奶冻外,同时仲有香甜嘅芒果慕丝同啖啖芒果肉食到。另外唔少得一贯招牌作好似绿茶歌剧院蛋糕、绿茶红豆卷、绿茶戚风蛋糕等,除甜品外,刺身寿司炉端烧等都系任食啊。

呢次主题下午茶系联乘韩国畅销化妆及护肤品牌合作嘅,所以凡两位惠顾,就可以免费获赠TONYMOLY 「THE CHOK CHOK 绿茶面霜系列」礼品包一份(数量有限,送完即止)。

仲夏绿茶水润下午茶自助餐
价钱:成人$328 /小童$218 (另加一服务费)
供应日期及时间:即日起 至 8月31日(逢星期六、日及公众假期,3:30pm-5:30pm)

Giuseppe Zanotti下午茶   丽思卡尔顿酒店  Café 103 

虽然而家系盛夏,但要走在潮流啄啄,比人行快一步,就已经要开始睇定秋冬嘢。呢间酒店就同意大利奢华鞋履与时装品牌Giuseppe Zanotti合作,以品牌秋冬女装系列Urban Beauty为灵感,推出咗一set高贵华丽嘅花园下午茶,10款咸甜点各有特色,仲特别以开心果同榛子入馔。红桑子芝士挞酸甜可口,花形图案则系根据品牌水晶高踭鞋设计;开心果挞以靓靓嘅食用花啫喱放顶,整体坚果香气浓郁。

凡惠顾下午茶,再喺社交媒体上打个卡,就可以有机会得到Giuseppe Zanotti嘅限量礼物啦。

GIUSEPPE ZANOTTI 下午茶
价钱:每份港币$418
供应日期及时间:即日起至9月15日,每日3:30-5:30pm

仲夏蜜瓜日式下午茶   四季菊日本餐厅

夏天梗要食蜜瓜!呢间餐厅嘅下午茶,仲以蜜瓜嚟做主题添,开心仔。滑捋捋又弹口嘅静冈蜜瓜白酒啫喱,清甜带芳香;蜜瓜忌廉饼啖啖果肉,口感软滑;蜜瓜椰子慕丝饼亦香甜多汁。另外仲有同样都系炎夏恩物:雪糕三文治,加埋多款日式美食,幻想自己去咗几个钟日本都好。

仲夏蜜瓜日式下午茶
价钱:$528(2位)
供应日期及时间:即日起,逢星期六、日3:00-5:15pm

文:Kar

关键字
下午茶
甜品
雪糕
梳乎厘班戟
尖沙咀
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
更多
收起
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
2020-07-31
全城抗炎!屋企都叹到三层架下午茶 Tea Set外送/外卖自取推介
2天前
全城抗炎!北角酒店最新应变 自助餐都有得外卖?
2020-07-17
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-07-30