爆笑潮语餸名 尖沙咀新创意Fusion菜馆 庆生必点扑朱古力寿桃
2020-09-17

香港人其实好有创意,唔信?打开尖沙咀呢间楼上Fusion餐厅嘅Menu睇睇:「真天真 玻璃心 芝士凯撒怎麽区分」、「如果太多猪猪味 加啲菠萝正到痹」唔系歌词而系餸名嚟!令人会心微笑同时食物质素亦唔错,主菜水准平均,有素食选择,仲有好啱打卡嘅创意甜品呀。
 


竹青亭系太子青花亭嘅分店,特别邀请本地画家Carol Mui手绘壁画,加上大玻璃窗、吊灯、云石餐桌都好啱影相打卡。店名竹青亭除咗有「竹性直,直以立身」嘅意念,同时竹青安好亦有「祝」福年「青」人嘅意思。
 


牛肝菌浓汤($48)

一开始先嚟碗汤,牛肝菌浓汤配杂菌薄脆长法包一上枱就闻到好浓香味!皆因除咗牛肝菌,仲用上多款杂菌一齐煮,所以饮落亦咬到少少菇菌蓉嘅咬口。开饭仔建议如果锺意法包外脆内烟韧嘅口感就将杂菌薄脆长法包同汤分开食,相反锺意菇菌香气嘅话就可以将汤加上去一齐食,双倍浓郁。
 


鳕鱼粟粟你好吗($258)

唔单止餸名趣致,配搭亦有惊喜,呢碟其实系爆谷香草芝士牛油焗嫩滑黑鳕鱼柳伴香辣粟米汁,嫩滑嘅黑鳕鱼同香脆爆谷估唔到口感又几夹!而带少少辣同少少甜嘅香辣粟米汁就可以带出鱼肉嘅鲜甜味,再加上清甜嘅粟米、蕃茄等,营造出唔同层次但又唔会越食越腻。
 


牛油慢煮原条龙虾尾 龙虾原汁三角意大利面($328)

另一心机菜式,新鲜龙虾尾已经起好肉,方便食到啖啖弹牙龙虾肉!而酱汁就用咗原只龙虾熬制,三角形嘅意大利面就可以沾上更多酱汁,食起嚟味道更浓郁,再加上XO酱就更香口。不过酱汁稍嫌过咸,唔系重口味嘅朋友搵多个朋友Share食好啲喇。
 


原个南瓜是日蔬菜糙米饭($128)

餐厅亦好贴心咁供应素食Menu,最吸引嘅就有呢款原个南瓜是日蔬菜糙米饭,真系直接用原个南瓜上枱!南瓜当中系新鲜蔬菜、杂菌同糙米饭。糙米饭含丰富膳食纤维同矿物质,而且口感较硬,同柔软清甜嘅南瓜一齐食就啱啱好。
 

更多【新店直击】:
1. 必食手工啤酒烤鸡+脆卜卜咸猪手!用心制作西餐厅进驻大角咀
2. 超抵食$340十道菜铁板烧套餐!湾仔新开亲民日式铁板烧专门店
3. 旺角新开全港最大韩国食品专门店 逾200款美食 + $99零食任装挑战



恭祝你福寿笑开个眉($108)

睇个名系咪估唔到呢个寿桃其实系白朱古力?最有惊喜嘅系敲开层白朱古力,里面仲有自家制茉莉花Pavlova、梨果酱同乌龙茶蛋糕!
 


茉莉花Pavlova口感似慕斯,柔滑清香;梨果酱保留一粒粒梨肉,爽口香甜;乌龙茶蛋糕亦食到少少茶叶碎,茶香同甜味平衡。外面仲有乌龙茶啫喱,甜度低而且带少少甘味,平衡返白朱古力嘅甜腻。
 


(左)茉莉很清楚收兵好过嫁人($54),(右)姜撞豆腐($54)

连饮品名都好过瘾,小心落Order嘅时候唔好唱咗出嚟先得。茉莉很清楚收兵好过嫁人系茉莉茶加上柠檬同无花果,所以饮落味道有啲似无咁涩又有无花果甜香嘅柠檬茶冰沙。姜撞豆腐以豆腐、姜、牛奶打成冰沙加上黄糖,味道完全还原豆腐花呀。
 





竹青亭
地址:尖沙咀金马伦道48号中国保险大厦1楼A及B号舖




文:Cathy
相、片:Tom Li

关键字
尖沙咀
Fusion菜
素食
竹青亭
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
1天前
【2021生日优惠】持续更新!5月食日本直送海鲜送西班牙红/白酒
2021-05-07
带妈妈味游异国!母亲节Brunch六选
2021-04-20
期间限定$1抹茶菠萝包、$3竹炭菠萝油 佐敦新开 2500 尺新派点心小厨
2021-04-30
荃湾新开 人气名古屋班戟分店 首推冲绳紫薯梳乎厘班戟+班戟汉堡
2021-04-15