熊本唔单止系Kumamon嘅故乡,仲系好多靓食材嘅产地!尖沙咀新餐厅割烹橹杏,就系以熊本为主题,九成食材都系来自熊本,当地有黑毛和牛、肥後六华豚、各式海产、烧酌等,连水都系熊本直送,咁要饮返够本喇!
主理嘅两位日籍厨师本田榥二同石山真夏,将充满熊本风味嘅锅物、刺身寿司带来香港,另外亦有融合法国及东南亚做法嘅fusion菜式,成个餐牌好厚,选择够晒丰富。
客人面前即炒焙茶
涮涮锅设焙茶及鲣昆布两款专用汤底,都会喺客人面前即席炮制!好似焙茶汤底,侍应将熊本名茶「矢部茶」放入特制器具,在客人面前即时用火烘焙,好快就闻到阵阵茶香,再将茶叶倒入来自熊本嘅清水之中,水滚後隔起茶叶,焙茶汤式就完成啦!
另一款鲣昆布汤底,选用熊本老店「山一」嘅高级本枯节鲣鱼,鲣鱼即刨即煮,汤底富木鱼鲜味。两款清淡汤底配A4级熊本和牛就最匹配喇。
焙茶汤底 $68、A4熊本黑毛和牛极上西冷 $258、肉眼扒 $258、西冷 $198
浓郁自家制汤底
和锅则以三款自家制汤底做主角,可以拣天空黑鲔鱼辣味噌汤、肥後六华豚猪骨汤、鹿儿岛赤鸡萨摩鸡汤,用足6小时熬成,味道相当浓郁! 和锅配肥後六华豚最夹,推介薄切猪脊肉片,肉质嫩滑带甜味。仲有六款调味料同配料,亦可以另加超浓缩骨胶原精华,令汤底更加浓香。
肥後六华豚猪骨汤、天空黑鲔鱼辣味噌汤、鹿儿岛赤鸡萨摩鸡汤 各$68
猪脊肉片 $78、猪侧扒 $98、猪肋肉 $98
更多【饮食潮流】: |
首创日式肉骨茶
至於最特别嘅菜式,一定系呢款日式肉骨茶!用肥後六华豚骨排加蔬菜、香料等熬6个钟,赤肉骨茶辣辣哋,有番茄同味噌味道;而黑肉骨茶则以黑蒜及酱油煮成,入口微咸富蒜香。每锅都好足料,起码要两三个人分!
赤肉骨茶、黑肉骨茶 各$158
餐厅门口有熊本空运来港嘅食材,包括蔬果、日本酒同调味料,连传统手工艺都买得到!
地址:尖沙咀弥敦道63号iSQUARE国际广场28楼2801号舖
电话:2818 0031
文、相:Perrins