烟燻+铁板菜式有惊喜 九龙城新开日式居酒屋 招牌烟燻五重芝士Pizza
2021-03-30

以香港人爱日本菜嘅程度,居酒屋喺各区都有唔少。最近九龙城呢间新店就搞搞新意思,主打一系列烟燻菜式,选用顶级樱花木燻制,可以提升食物风味,招牌之一就系烟燻五重芝士Pizza!铁板菜式同活鱼刺身都有水准,而且定价亲民,值得一试。
 


上户酒场位於九龙城龙岗道,供应多个种类嘅日本菜,包括坊间较为少见嘅烟燻菜式同活鱼刺身。用料严谨,海鲜嚟自日本各地,以时令飞机货为主。居酒屋唔少得嘅日本酒亦有多款选择,例如嚟自日本各地嘅清酒,容易入口嘅日本果酒等。
 


烟燻五重芝士Pizza($108)

居酒屋招牌菜之一,五重芝士分别系日本制嘅蓝芝士、高达芝士、德国草原芝士、车打芝士,同及格拉娜·帕达诺芝士(Grana Padano)。批底会先煎香,再以樱花木烟燻约5分钟,令Pizza带有浓郁烟燻香气。批底偏薄身,香脆烟韧。芝士趁热有拉丝效果,口感香软。
 


烟燻厚切三文鱼($78)

同样以樱花木烟燻,主角换成挪威三文鱼,切成Bite Size一啖一件啱啱好。燻至半熟嘅三文鱼粉嫩诱人,而且口感非常软滑,先品尝到烟燻香气,之後有鱼油香,层次分明。
 


烟燻日本豚腩肉($78)

锺意重口味啲嘅话就推介呢款烟燻日本豚腩肉,厚度适中嘅腩肉先煎香同时逼出多余油分,最後用樱花木烟燻。豚腩肉食落外脆内软,油花甘香,咸香惹味,送酒一流呀!
 


烟燻穴子寿司($68)

穴子即系星鳗,比一般食到嘅鳗鱼油脂较少,肉味淡雅,肉质就更为软腍。呢件烟燻穴子寿司嘅穴子会加上香甜嘅鳗鱼汁再烟燻,然後将穴子包住用日本米制作嘅寿司饭,最後加上蟹子。可以食到穴子嘅柔软香甜、一粒粒蟹子嘅爽脆,同寿司饭嘅软糯,口感丰富。
 


龙虾味噌虎虾($178)

除咗烟燻之外,餐厅嘅铁板菜式都值得一试。好似呢份龙虾味噌虎虾就鲜味十足。大大只虎虾先用铁板煎香,锁住鲜味後加上里面有龙虾味噌,一上枱就闻到好香浓嘅虾味!虎虾口感非常爽脆,而龙虾味噌唔单止增加鲜甜风味,里面嘅虾肉亦好弹牙。
 


铁板鲍鱼($98)

鲍鱼都系$100有找!而且无将货就价,用嘅系嚟自南非嘅新鲜鲍鱼,肉厚弹牙。煎嘅火候亦恰到好处,食落嫩滑唔韧。配搭特制嘅蟹肉昆布汁,味道层次就更丰富。
 

更多【新店直击】:
1. 日本罐头酒吧品牌首度登陆香港 必试世界首个玉子烧罐头+芫茜Cocktail
2. 必试招牌台式葱油鸡+香浓奶油虾煲 太子人气台湾菜小店荔枝角重开
3. 必试麻辣鸡堡/芫荽牛堡 每日手打150g汉堡扒 深水埗亲民汉堡小店

 

葱吞拿鱼腩薄脆($58)

送酒小食推介之一,炸米通上面系吞拿鱼腩蓉、黄瓜碎、大叶碎同京葱碎,色彩缤纷令人食指大动。金黄色嘅薄脆同吞拿鱼腩蓉一脆一软层次分明,略嫌吞拿鱼腩蓉嘅油香唔太明显。
 


烧明太子伴青瓜片($88)

锺意惹味小食嘅就可以食呢款烧明太子伴青瓜片,明太子烧过後香气更浓郁,切成一片片配搭青瓜片。食起嚟明太子嘅微辣同咸香非常醒胃,同时多汁清脆嘅青瓜就中和返明太子嘅浓味。
 


时令活鱼刺身(原条)(时价)

原条活鱼刺身真系唔常见,呢度就会视乎季节,定期推出唔同嘅本地活鱼刺身。好似呢期就有肉质鲜美嘅鲷鱼,切至半透明嘅薄片,点少少酸汁更突显鱼肉嘅鲜甜味。
 


刺身拼盘($438/六款)

刺身拼盘有五款、六款,同八款配搭选择,好似拍摄呢款就有赤贝、帆立贝、吞拿鱼腩、油甘鱼、三文鱼、三文鱼籽。非常新鲜,而且系厚切!
 


(午市套餐)牛舌薄烧配三文鱼炒饭($78)

想食平啲Lunch Set就最啱,最平$78就有得食之余仲包埋海鲜味噌汤同前菜。锺意食牛舌嘅话就要试牛舌薄烧配三文鱼炒饭啦,牛舌薄片调味後加上蒜片、牛油等放上先预热嘅铁板上,烧至约4成熟嘅时候上枱,大家就可以按自己喜欢控制熟度。而且饭唔系普通白饭,而且加入三文鱼、樱花虾、鸡蛋等材料嘅炒饭,特别香口。
 


(午市套餐)上户海鲜丼($248)

想豪啲亦有海鲜丼,呢份就有齐海胆、蟹钳、带子、赤虾、拖罗、蟹膏,同蟹籽,铺满到争啲见唔到饭呀。刺身新鲜,特别系拖罗入口即溶,富鱼油香。
 




上户酒场 
地址:九龙城龙岗道33-39号龙翔阁地下A号舖




文、相:Cathy

关键字
九龙城
日本菜
居酒屋
烟燻Pizza
刺身
清酒
上户酒场
新店直击
走在最前线,为大家搜罗及报道有关新开餐厅的资讯。
餐厅资料
本月热门
【2021生日优惠】持续更新!9月寿星叹Omakase送寿司蛋糕+清酒
2021-08-31
【随时更新】零食速报 每周新款零食、酒品点评
2天前
【特约分享】Happy Hour饮番杯Schweppes®期间限定特饮!9间必去铜锣湾餐厅(上)
2021-08-24
【特约分享】Happy Hour饮番杯Schweppes®期间限定特饮!9间必去铜锣湾餐厅(下)
2021-08-31
自家制作!五间手工意大利面专门店合集
2021-08-24