對鋸扒有返咁上下要求又想食得經濟啲，嚟灣仔呢間新開嘅美式扒房試試啦。同一般西餐廳唔同，餐廳獨沽一味只賣呢個$298牛扒套餐，包括一份沙律、自家製肉桂牛油餐包同黑安格斯牛扒，仲有得任食薯條，由沙律到牛扒都咁高質！
餐廳選用美國1855黑安格斯肉眼牛扒，達至U.S. Prime等級。牛扒由美國空運到港，無經過任何雪藏，兩面都塗上牛脂後大火煎香，肉質軟腍好Juicy，而且牛脂味香濃。大胃王驚唔夠飽，套餐仲包埋任食薯條，以$298嚟講價錢真係好親民！
特製牛扒刀亦是餐廳特色之一。
想味道更有層次，可以點埋跟配嘅兩款醬汁。黑椒汁加入洋蔥、蒜頭、新鮮原粒黑椒及自家熬製嘅牛肉湯，好惹味；紅辣椒醬就用燈籠椒、辣椒及檸檬汁等材料製成，味道就清新啲。
更多【新店直擊】： |
肉桂牛油餐包都好值得一試，餐廳用返集團旗下人氣漢堡店Burger Joys用一百萬買返嚟嘅配方製作，餐包好鬆軟，肉桂牛油香而不膩。
沙律醬汁用蛋黃、檸檬汁、鯷魚及外國出名嘅Dijon mustard製成，食牛扒前可以開吓胃。
地址: 灣仔軒尼詩道239號18樓
文: Yanica
相、片: Tom Li