唔少人都锺意去东南亚旅行，泰国曼谷就系其中一个热门旅游点，每日疯狂Shopping、做massage、食好西是常识吧。开饭仔专诚搵咗泰国当地嘅同事为大家搜罗在地人最推介嘅美食！

平时喺香港都已经锺意周围去食个下午茶嘅朋友仔，去到泰国，当然都要见识下当地嘅afternoon tea啦~ 一於搵呢几间café去 chill下啦~

贵气下午茶 Divana Signature Cafe

  Divana招牌下午茶套餐 baht 1,200

锺意花花嘅女生要注意啦~呢间café由一个泰式按摩品牌开设，承继返一直以嚟嘅贵丽风设计，就好似喺花园叹茶咁，唔讲唔知自己喺百货公司呀！嗌一份招牌下午茶套餐，同闺蜜share一壶茉莉茶，叹个英式松饼、马卡龙、心太软，梗唔少得泰国名物——「芒果糯米饭」呀！呢个下午茶由摆碟设计，到每一件甜点都非常有心思，打卡呃like最啱！

花园中叹茶 The Blooming Gallery

  二人下午茶套餐 baht 890

喺呢间café食嘢，就宛如置身花园一样，咁就梗要扮贵妇叹茶啦！下午茶套餐有英式松饼、造型精致嘅蛋糕同自家制三文治等等。仲可以拣返壶茶慢慢叹～嗜甜嘅朋友们可以试下 “Hello Mr.Caramello”，茶中带淡淡嘅焦糖甜味～

日式下午茶 Up & Above (The Okura Prestige Bangkok)

 Okura下午茶套餐 baht1,290 （连茶或咖啡） 

识食afternoon tea当然要去酒店食啦！呢间酒店嘅下午茶套餐就包括一系列嘅日式咸点，仲有非常精致嘅传统日式糕点。另有多款茶啡选择，特别介绍Marco Polo嘅黑茶同薄荷莲花茶。坐喺26楼嘅cafe度，望住曼谷靓景叹靓茶，呢啲咪叫chill罗～

我和秋天有个约会 Curve 55 (Hotel Nikko Bangkok)

  下午茶套餐 baht 990（连茶或咖啡）/ baht1,190 （连气泡酒或鸡尾酒）

就快踏入十月，闻到秋天嘅味道未呀？呢间位於曼谷嘅日本酒店就有set新推出嘅秋日下午茶喇～包括有时令嘅士多啤梨、栗子等。同时仲可以试埋蟹籽伴皇帝蟹配面包、芒果、鳗鱼卷物等～好丰富。btw佢哋嘅下午茶主题会按季节转换，去之前可以睇下佢哋嘅Facebook 先~

粉红少女心 The Bakery ( The Athenee Hotel Bangkok)

  粉红丝带下午茶套餐 baht 1200 （至10月22日）

Afternoon tea除咗要食得好，梗系仲要食得靓啦！呢间酒店最近推出嘅下午茶，无论咸甜点好似马卡龙、蛋糕、慕丝、朱古力等通通都系粉红色，非常有少女心~要数最特别就一定系杯粉红色嘅鸡尾酒啦！原来系为慈善筹款呀，部分下午茶餐嘅收益会喺10月嘅国际乳癌防治月期间捐出。