泰好食！曼谷唐人街街頭小食推介 (日間版)

唔少人都鍾意去東南亞旅行，泰國曼谷就係其中一個熱門旅遊點，每日瘋狂Shopping、做massage、食好西是常識吧。開飯仔專誠搵咗泰國當地嘅同事為大家搜羅在地人最推介嘅美食！

鍾意掃街嘅朋友仔，去到曼谷當然都要掃街啦，去唐人街就啱晒，呢度集齊咗超多款人氣街頭小食呀，不過如果想食盡佢嘅話，可能日頭嚟完一次夜晚又要嚟多次啦，因為朝早同夜晚嘅舖頭係唔同㗎！今次就先同大家介紹日頭嘅小食店先~

招牌菜：鹹水粿 (30 baht)

鹹水粿製法簡單，以米漿製成粿子，再加入爆香嘅菜脯同埋辣椒醬等，食落外外軟滑，味道鹹香。喺曼谷唔係太易搵到咋，所以嚟到唐人街就記得搵嚟試啦~

招牌菜：叉燒雲吞麵 (50 baht)

呢間餐廳嘅麵食一向以大碗夾抵食見稱，一碗麵兩個人些牙都夠食。大食少少嘅話建議揀Special size，可以加麵、加叉燒，或者加雲吞都得。不過溫提一下，想食雲吞嘅話要朝早10點前嚟到呀！

招牌菜：燒賣(3 baht/粒)

呢間小店位於Plaeng Nam road，喺間神社前面。店主事事親力親為，煮又係佢，serve客又係佢，好忙碌，好在阿仔都有喺度幫下手。話燒賣係佢哋嘅招牌菜一啲都唔誇張，因為呢粒燒賣，係以佢哋百年祖傳秘方製作㗎，就連醬汁都係自家製，充滿誠意，喺第二度食唔返呢種味呀。重點係，平！3 baht一粒，兌返港紙即係7毫子左右粒咋！

Jae Da Seafood Salad 新鮮海鮮

招牌菜：香辣醬油蟹沙律 (1,200 baht/kg) (可買少於1kg)

海鮮控嚟呢間就啱晒，有醬油蟹、生蝦等新鮮海鮮，撈埋各種香料食材一齊整成辣辣沙律，好鬼惹味。不過呢度就冇位坐嘅，只做外賣生意咋留意返。

Bua Kia Hai Lum 清爽甜品

招牌菜：Bua Kia (20 baht)

泰國熱辣辣，食啲冰品就最爽。呢間甜品店主打嘅Bua Kia，一碗有齊紅豆、椰子啫喱、花生、白果、甜麵同粟米，淋埋黑糖漿，口感相當豐富，冰感十足。