打边炉嚟讲，汤底绝对系灵魂精髓，一个好嘅汤底，能够令各种食材同配料变得更加鲜香甜味。今次要介绍嘅两间九龙区火锅店，一间主打滋补养颜汤底，另一间麻辣、养生兼备，作君选择。

炊水荟（油麻地）  

打边炉个个都系边「炊水」边吹水。炊水荟每日12点後都有多款鸡煲同火锅选择，既有麻辣口味，亦有养生款式，就连辛辣程度都有得拣，想同朋友喺九龙旺区搵间坐得耐啲嘅餐厅吹水食嘢，可以谂谂佢。

四川麻辣鸡煲

鸡煲份量都几大，适合2-4位享用，辛辣配料全部由四川送运，包括有两款唔同嘅四川花椒同乾辣椒等，香麻兼备。餐厅选用肉质嫩滑，味道鲜甜嘅三黄鸡制作，而且重会喺客人面前即刻炒两炒，爆香洋葱，有埋视觉同嗅觉嘅加持，食慾更加提昇。

水鱼文昌鸡锅

选用肉质较烟韧嘅野生水鱼，同埋文昌走地鸡制作，两者都比较有嚼口，而且互相增加鲜甜香味。师傅喺熬煮汤底後更加入花雕酒，使层次变得丰富，食出阵阵酒香。

花胶鸡煲 （大）

平时打边炉成日都好想饮埋个汤底，但又怕热气又怕太咸，呢个花胶鸡煲就可以喇。每煲都有一整只鸡，加6个花胶筒，够晒足料。花胶更加系预早两三日已经发定，连埋鸡脚、猪筒骨、药材等熬煮8个钟，汤底煲到融晒，相当清甜，绝对值得喺未渌任何嘢之前，哔返碗饮下先~

水煮牛肉锅

满缸红嘅水煮牛肉锅，单睇色泽已经足够令一众辣椒仔女拜倒裙下，深红色嘅红油，加埋铺满面嘅辣椒，已经为佢嘅刺激做咗预告。水煮酱由师傅自家炒制，牛肉、配料等索尽精华，香辣惹味。

酸菜龙趸锅

最後要介绍嘅系酸菜龙趸锅，师傅话特意选上约30斤重嘅龙趸，咁先至会够多肉，够鱼香。果然不负众望，厚厚嘅鱼片啖啖肉，混埋花椒辣椒同酸菜等，酸辣开胃。

尚膳养颜滋补锅（旺角） 

香港人一年四季都要打边炉，既然要食，不如食吓啲养生嘅，旺角呢间火锅专门店以各式真材实料嘅滋补汤底为卖点。装潢方面深木色为主，好古色古香，座位宽敞以屏风作间隔，私隐度都几高，打边炉都打得零舍舒服喇。火锅配料方面都好高质素，如手切牛肉及手工丸类等，部份食材更可以点半份，就算两个人食都可以试多几款！

鸳鸯锅（尚膳养颜美人锅＋麻辣锅）

招牌养颜美人锅以金华火腿、老鸡、赤肉及多款滋补药材熬制而成，锅内仲有埋乌鸡同埋女士们最爱嘅桃胶，味道清甜浓郁，营养丰富又够晒滋补！如果想试多一个汤底，餐厅推荐美人锅配上麻辣锅，呢度嘅麻辣锅系台湾风格，香辣带麻唔会呛喉，可以直接饮用，加埋台湾直送鸭血及吸汤嘅冰豆腐，好足料。

滋润鱼云静心锅

平时锺意饮鱼汤，呢个滋润鱼云静心锅就啱晒。汤底以川芎、白芷、天麻、新鲜鱼头、竹丝鸡、老姜、白胡椒粒及当归等药材熬成，药材味唔会盖过鱼嘅鲜味，有头风及偏头痛人士饮就最适合。不过温馨一提此汤底不适合孕妇食用呀。

酸菜白肉锅

如果想食啲开胃嘅汤底，酸菜白肉锅由自家腌制酸菜配上新鲜猪骨汤，味道酸香浓郁令人愈食愈开胃。锅内有埋五花肉及寛粉条，前者肉味浓厚带有阵阵酒香，酸菜汤底中和返五花肉嘅油腻感；後者就烟韧Q弹，就咁食个锅嘅食材已经好满足！

姜母鸭汤

台式传统汤底，具有暖身及躯寒效果，食落滋而不腻、温而不燥。以新鲜米鸭、猪骨、老姜及多款上等药材如桂枝、川芎、人参及红枣等大火熬足12小时，适合平时手脚冰冷人士饮。

椰子鸡锅

清甜嘅椰子鸡锅以新鲜椰青水、老椰子肉及海底椰慢火熬煮，特别一提餐厅选用湛江走地鸡，呢种鸡系食谷米及草长大，生长速度慢，所以肉质嫩滑，鸡味香浓，简单点一点沙姜酱汁已经好好食。

心动不如行动！有兴趣就快啲约埋三五知己去叹下美食！快啲bookmark定啦！    

*以上图片只供参考，所有食品以实物为准. 食品供应因餐厅而异