水蟹其實係乜東東？ | OpenRice 香港开饭喇

魯迅bb曾經講過：「第一個吃螃蟹的人是很令人佩服的，不是勇士誰敢去吃它呢？」，但係蟹肉味鮮，今時今日好多人都想嚟個華麗「蟹」逅。其實螃蟹唔係得大閘蟹一隻（笑），實質品種繁多，所以製法都變化多端，我哋成日聽嘅水蟹粥就係其中一個「因材施煮」嘅好例子，但其實水蟹又係乜東東呢？

Photos by ＜IVY＞
水蟹其實係青蟹嘅一種，青蟹喺生長過程之中會脫殼十幾次，啱啱脫殼嘅青蟹身體柔軟，變咗我哋成日聽嘅「軟殼蟹」。呢個時候嘅軟殼蟹，會舒舒服服攤喺水底吸取大量水份，令佢蟹肉內嘅含水量大增，到佢啲新殼變番硬時，就已經係一隻水蟹啦！

Photos by 美食焚化爐
咁水蟹同其他品種有咩分別呢？佢唔似黃油蟹咁，擁有豐潤甘香嘅蟹膏，蟹肉又唔及大閘蟹豐實鮮美。相反，水蟹蟹肉較其他品種要少，而且水份亦多，所以較少好似其他蟹咁就咁下菜。但係，水蟹勝在味道清甜，所以水蟹可以點整呢？

Photos by eatmugfoods
無錯！就係下粥啦！水蟹粥係澳門地道美食，水蟹令粥底更加清甜，再配以膏蟹同肉蟹嘅精華令成碗粥蟹香飄飄，味道豐富。睇見係咪都想食番碗呢？

文：段

隨時接收最新資訊
讚好OpenRice專頁！