正宗备长炭蒲烧鳗鱼、穴子 北角新开日式居酒屋(有片)
2019-09-24

香港有唔少日式串烧居酒屋,北角呢间新开嘅就主打使用香港比较少见嘅正宗明火炭炉,采用日本备长炭,特点系耐烧而且温度稳定,可以锁住肉汁,令串烧外脆内Juicy。加上选用日本各地时令食材,例如静冈野生鳗鱼、北海道豚肉等,风味地道。
 


Koji Charcoal Grill位於北角,餐厅中间系半开放式厨房,里面有电炉,同请日本工匠特别设计定制嘅炭炉。主要由总厨Kenji同两位日籍师傅主理,从选择食材、烹调方法到酱汁制作都一丝不苟。
 


烧和牛肩沙律($135)

品尝串烧之前先嚟一道沙律,柔软嫩滑嘅慢煮和牛片上面系一丝丝香葱,同酸爽清新嘅柑橘醋啫喱。令脂肪较多嘅和牛食落毫无油腻感,口感层次丰富,酸味亦唤醒味蕾准备迎接之後嘅盛宴。
 


免治鸡肉丸($35/串)


盐烧鸡翼($30/串)

日式串烧当中唔少得鸡肉,免治鸡肉丸选用四国嘅鸡肉,手打鸡肉混入鸡软骨增加香脆口感,以电炉烧制後配搭餐厅自家制嘅浓厚酱油,味道香甜。而盐烧鸡翼就用炭炉慢烤,唔单止可以烧出鸡油,亦达至皮脆肉嫩嘅效果,只要简单加少少盐就够香口。如果怕鸡皮食落太油嘅话,可以加少少青柠汁平衡返。
 


豚肉包流心蛋($42/串)


猪柳片包明太子($48/串)

豚肉包流心蛋选用油脂丰富嘅北海道豚肉,包裹日本流心蛋烧至外面微焦,令豚肉嘅脂香同半熟蛋黄嘅蛋香喺口腔融合一齐,口感层次亦相当讨喜。而猪柳片包明太子系新鲜嘅配搭,福冈猪柳片里面系紫苏叶用北海道明太子,先闻到紫苏叶嘅独特清香,然後系明太子嘅微辣惹味同一粒粒口感,细细份但滋味十足。
 


烧和牛横隔肉($60/串)

餐厅有唔少酱汁都系自家制作,例如呢份烧和牛横隔肉就用苹果、蕃茄等调配秘制牛肉酱汁,味道香甜浓郁。配搭肉味香浓、口感爽弹嘅澳洲和牛横隔肉就啱啱好。
 

更多【新店直击】:
1. 东涌新开9000尺美食广场 米芝莲推介泰菜/清汤腩+猪大肠肉骨茶
2. 继承爸爸六十年手艺!旺角新开家庭风味台湾菜 家传红烧牛肉面、家乡盐酥肉
3. 超Duck意点心登陆旺角!香港首间B.Duck & Buffy茶楼

 

炸虾卷($75)

呢个嘅酱汁更有惊喜!用杯装住嘅白色酱汁其实系非常轻盈嘅忌廉蚬汁泡沫,鲜甜香滑。当然主角炸虾卷亦唔普通,以酥皮幼丝包上鲜虾再油炸,保留虾肉嘅弹牙,亦增加一层蓬松香脆嘅口感,所以点埋忌廉蚬汁一齐食,增添鲜味同湿润口感,系一道令人难忘嘅菜式。
 


炭火烧鲔鱼面颊($150)

鲔鱼面颊肉相当珍贵,特色系睇落有啲似肉扒,油脂丰腴、肉质软嫩。餐厅用炭炉将鲔鱼面颊肉烧至外面微焦,烹调时间到生熟度都适当拿捏得唔错。可以先试一件原味,然後按自己口味点柚子胡椒酱或者加青柠汁减低油腻度。
 


日本蒲烧野生鳗鱼($480)

同炭火香夹嘅当然唔少得鳗鱼,总厨Kenji特别选用静冈嘅优质野生鳗鱼,当地水源清澈,鱼肉自然无泥腥味。而且野生鳗鱼比养殖鳗鱼口感更弹牙。加上蒲烧酱汁後烧至两面香脆,色泽香气诱人,肉厚得嚟又够肥美。
 


炭火烧穴子($210)

穴子又叫星鳗,外形同鳗鱼相似,但其实穴子系海鳗,脂肪较少。呢度总厨Kenji用嘅系东京湾嘅穴子,用秘方处理以去除鱼腥味,再用炭火烤至外皮香脆。唔需要加任何调味,可以突显出穴子淡雅嘅香气、细腻嘅鱼肉同淡淡嘅炭香,当然亦可以选择点少少海盐或青柠汁提鲜。
 


炭火烧鲍鱼($220)

鲍鱼亦用炭炉烧烤,口感弹牙而且成功锁住肉汁,彰显三位日籍师傅功架。鲍鱼搭配香草牛油增加香气,略嫌蒜蓉太多,盖过鲍鱼本身嘅鲜味。
 


金目鲷土锅饭($330)

最後一定要试呢个金目鲷土锅饭,土锅耐热而且传热平均,令里面每粒日本珍珠米都煮至晶莹饱满,粒粒分明而且口感烟韧。一开盖就闻到柚子清香,然後店员会即席将炭烧金目鲷同饭一齐搅拌。饭本身用日式高汤同柚子皮去煮已经有幽幽清香,日本直送嘅金目鲷更加先用秘制酱油腌制,炭烧时会再重复刷上酱汁,味道香甜浓郁。建议大家一定要「留肚」享用!
 




Koji Charcoal Grill
地址:北角马宝道28号华汇中心地下6号舖




文、相、片:Cathy

关键字
北角
日本菜
炭炉
鳗鱼
穴子
串烧
居酒屋
Koji Charcoal Grill
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】最後倒数!即将结业的老字号及人气小店
2020-05-19
【随时更新】零食速报 每周新款零食、酒品点评
1天前
全城抗炎!人气酒店自助餐重开 每位送鲍鱼、带子
2020-05-11
全城抗炎!喺屋企做大厨 懒人煮食包/套餐集合文
2020-05-13
旺角新开花艺Cafe 丰富全日早餐+明太子猫耳朵+特调有机花茶(有片)
2020-05-18