饺子控注意喇！荃湾最近新开一间饺子店，系人气小菜馆楚捻记大排档嘅新line，店舖正正位於楚捻记嘅地面，暂时只做外卖生意，可以买煎好嘅同生饺都得，不过好快就会有埋堂食㗎喇～餐厅主要供应创意煎饺、手工点心及老火靓汤，每日新鲜人手制作，诚意满满！
香煎潮汕韮菜粿（$10/个）
韭菜粿系潮汕特色小食，香气浓郁嘅韭菜馅配上烟韧嘅皮～呢度嘅水晶皮同样做得烟韧有厚度，而且於韭菜馅内加入虾米增加鲜味，令味道生色不少！
手工水晶包（$8/粒）
水晶包都系自家手工制作，外皮同样做得出色，皮薄晶莹剔透，馅料就有四个选择，包括抺茶、紫薯、奶皇及麻蓉，抺茶香甜回甘，麻蓉芝麻香气突出，唔会过於甜腻～除咗水晶包，仲有传统莲蓉馅及新派奶皇馅嘅寿包选择！
更多【新店直击】： |
自家制饺子（$30/6只）
餐厅一共供应十款口味嘅饺子，款款都皮薄馅靓，而且口味都好特别，坊间比较少见，配埋自家制辣酱、辣菜脯及陈醋食仲正～好似韩式泡菜牛肉饺，带有泡菜嘅辣同酸，惹味得嚟好开胃，食多几只都无问题。黑松露什菌饺加入萝卜及木耳等食材，最重要系黑松露味好突出～
另外一款较特别有虾米香菇翠玉瓜猪肉饺，爽脆嘅翠玉瓜配上有咬口嘅虾米及冬菇，口感好丰富，虾米亦令成只饺更有鲜味，味道清新。
西洋菜鲜虾猪肉饺嘅虾肉爽口弹牙鲜甜，再带有淡淡嘅西洋菜香气，比例恰到好处；东北京葱羊肉饺羊味都几浓，啱晒锺意食羊嘅朋友～
地址: 荃湾川龙街118号百悦坊地铺
文: Yanica
相、片: Calvin