柴湾街坊新旧秘店大搜查
2016-01-18
所有Food Lover都会有自己嘅一张心水List,但当中有无柴湾嘅餐厅?讲起柴湾大家未必谂到好餐厅,只系因为大部分平民小店都非常低调,但只要搵老街坊问一问,就会发现柴湾其实仲有唔少平靓正嘢食。

坚持品质半世纪  牛记茶室


(Photos by 手机上传 & cherry tabo)

牛记对唔少香港人嚟讲系半世纪老店,但对部分柴湾人嚟讲可能系新店,事关牛记原本喺西环,因为业主加租转折之下,喺2014年年中搬到柴湾。幸好老板权哥各位老伙计都仲喺度,茶室嘅各款招牌小菜先得以保留,清汤萝卜牛腩煲同玫瑰花皇太后鸡都系必点之作。新加茶市卖埋点心,无小菜咁出名,但平均水准都OK。

怀旧车仔豉油捞面  财记粥面


(Photos by Kan Lee)

唔少香港人都一定食过经济实惠嘅车仔面,但呢度嘅车仔面唔系汤面而系豉油汁捞面。豉油汁调味得宜,配蛋面一流。餸方面以咖喱鱿鱼最受欢迎,弹牙美味。心大心细嘅可以拣杂面,有齐鱿鱼、猪红、猪皮、猪肠、萝卜、鱼蛋、螺肉、面筋同菜心,食得辣嘅记得要加唔少街坊推介嘅咖喱汁。另外加腐竹同白果煲嘅白粥亦有唔少捧场客。

老牌街坊斩料店  新桂香烧腊


(Photos by JJcaptain & 小劲健)

斩料~ 斩大旧叉烧~新桂香最出名嘅烧味就系叉烧,用嘅系新鲜猪嘅脢头肉,蜜汁唔太甜而带出猪肉香味,叉烧外表红润入口松化。老街坊钟意佢肥美而且有燶边,需要Keep Fit嘅亦可以要求半肥瘦或者瘦叉烧,师傅都会尽量按你要求分比你。当然,要食靓叉烧都要付出代价,呢度嘅烧味价钱唔算大众化,一个人嚟食碟头饭会比较抵。

传统旧式茶餐厅  香江茶餐厅


(Photos by Gourmet KC & Yinh)

老实讲,单系呢间茶记就唔足够好味到叫人跨区都要嚟试,但如果嚟柴湾做嘢经过嘅就不妨嚟呢度坐下,因为呢种旧式茶餐厅真系买少见少。当然入到餐厅又无理由斋坐嘅,呢度最多食客推荐嘅系炒粉面。肉丝炒面嘅生面饼炸到金黄脆身,肉丝芡汁分量同调味都啱啱好,乾炒牛河香口唔油腻。奶茶咖啡亦有相当水准。

街坊食堂隐世大排档  成记饭店


(Photos by 小连 & Arale_yuen)

传统嘅排档已经买少见少,而柴湾工业区熟食中心地下就仲有呢档成记。必点之一粟米斑块,鱼柳鲜嫩雪白,粟米汁亦够香甜,可以捞成碗白饭食。其他菜式亦绝不欺场,睇得出厨师嘅功架同镬气都非常有水准。如果你有其他嘢想食而餐牌又无嘅,可以试下问一问老板成哥,有材料嘅就会煮比你,果然系街坊食堂。

简单暖意最满足  金记粥店


(Photos by jo_b)

除咗排档,街市熟食中心亦系搵街坊食堂嘅好地方。呢间金记粥店一向都多街坊捧场,原因无他,就系粥底够绵够米香而且入口软绵。而且除咗老友记,呢度都有唔少後生仔女嚟食呢度嘅特色炸两卷,有虾米、牛肉同叉烧三款,其实即系用有馅嘅肠粉嚟包香脆油炸鬼。虾米就最香口,再点甜酱辣酱配白粥一流。

超厚雪糕格仔饼  BB鸡蛋仔


(Photos by candycan & sum_jessica)

近年鸡蛋仔大热,除咗可以用嚟做雪糕筒之外仲可以加入唔同材料创新口味。呢间小店以无添加连BB都食得嘅鸡蛋仔作招徕亦有唔少新口味,例如有比利时朱古力粒同焦糖。但呢度最多学生捧场嘅系雪糕格仔饼!香脆有蛋香嘅格仔饼夹各种口味包括朱古力、绿茶、芒果等等嘅雪糕,虽然雪糕唔系咩大牌子,但$18就有一份咁厚嘅雪糕格仔饼,边度搵?

心机甜品小店  糖兄弟甜品屋


(Photos by Raul L. & homoon)

唔好以为旧区都无好嘅甜品舖,呢间小店系唔少街坊嘅心头好。新鲜菲律宾吕宋芒会保证熟咗先用嚟整甜品,唔会食甜品反而食到一口酸咪咪。招牌甜品芒之恋人就有鲜打芒果汁、芒果肉、椰果同果汁珠珠配北海道3.6牛奶蛋白布甸,各种口感嘅芒果甜香同滑嘟嘟布甸非常夹。其他甜品例如芒果小丸子同杂果杨枝甘露都系心机之作。

随时接收最新资讯
赞好OpenRice专页!


关键字
柴湾
茶室
茶餐厅
叉烧
雪糕格仔饼
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
【新店直击】青洲灶记咖啡氹仔新登场!
2016-08-09
荔园茶餐厅尖沙咀开店 焦糖温泉蛋西多够创意(有片)
2017-06-09
【当时得令】氹仔三大牛尾汤通粉比拼
2017-05-11
【开饭热店入围名单巡礼】小城地道茶记面档寻滋味
2017-02-27
【爱心热店专访】派饭背後 深水埗明哥:我唔认为自己有爱心,我只系用心 (有片)
2017-03-07
不可错过的新派粤菜
2016-12-05
餐厅资料
更多
收起
本月热门
【随时更新】零食速报 每周新款零食、酒品点评
3天前
悠长假期 复活节下午茶推介
2021-03-26
【2021生日优惠】超爽着数!免费任饮任食日式烧肉/火锅(持续更新)
3天前
【只想专注做好牛腩】金融经纪转行湾仔开浓汤牛腩面店 招牌牛骨浓汤崩沙腩河
2021-04-01
【最平$298最贵$938】佐敦新开日式和牛烧肉放题 独家引入鹿儿岛小田和牛
6天前