近日呢間韓燒店嘅$88任食五花腩優惠喺燒肉界都幾哄動，吸引一班燒肉狂迷去挑戰！但挑戰之前，參考下開飯仔嘅任食五花腩賽後精華先啦，有讚亦有彈，畀食客們可做足準備，密密食到大量又好味嘅五花腩！

介紹番少少基本資料先，今次挑戰嘅係呢間韓燒開業兩周年嘅特別優惠：$88限時任食韓國五花腩！優惠除咗可任食五花腩之外，仲有爐邊蛋、芝士、泡菜及粟米4款配菜。

有乜要讚？

#1 五花腩成吋厚

優惠講到明厚切，開飯仔梗係注意下五花腩有無「厚切」啦！一上枱見到五花腩有成吋厚，隔離枱一樣，都幾揼本。

而且出動餐廳招牌熨斗令五花腩平均受熱，兩邊各壓3分鐘就食得，食落好有𡁻頭又充滿油香。重口味嘅人仲可以蘸枱上嘅燒汁、辣汁添！

#2 豪食再追加

身為食肉獸，又點會單單滿足於五花腩呢？除咗豬肉，另加$68就可任食美國USDA認證嘅穀飼牛扒添。店員會同你換成燒烤網，連熨斗都唔使出動，兩邊各燒3-4分鐘就食得，肉質比五花腩軟腍，而且好多汁，正呀！

如果怕太油膩仲可以追加生菜，整番個生菜包腩肉，口感會fresh啲架！想再飽肚啲，亦可選擇追加韓冰水冷麵($38)、大圓手攪飯($48)、車站見麵($48)。4位以上幫襯嘅話可免費喺以上3款任擇其一添！

#3 配菜勁吸引

通常配菜都只係「買菜搭棵蔥」，感覺一般。但今次配菜係爐邊蛋喎，任叫任食喎，一定無得輸！你可以單食蛋，又或者混合芝士嚟拉下絲，又或者加粟米增加口感，又或者加少少舖頭自製嘅泡菜，任你試勻咁多種食法！

有乜要彈？

#1 時間太少

90分鐘限時略嫌緊湊咗少少，始終燒肉需要時間，而且每次燒肉拿捏嘅時間未必準確（除非你每次都用計時器啦！），有時又可能會燒燶要再燒過，如果係120分鐘就可以食得輕鬆啲！

#2 不包飲品

食得多燒肉都想飲啖嘢解渴啦，呢杯草莓特飲($48)，甜甜哋都幾解渴，仲有倒插嘅韓國七喜，好啱影相。不過可惜，優惠不包飲品。如果計埋飲品、追加嘅牛肉生菜，仲有加一，條數就大大遠離$88啦！

$88任食厚切五花腩優惠
供應日期：即日起至10月11日（暫定）
供應時間：7pm前、9pm後
供應分店：旺角、元朗
價錢：$88/位，最少兩位起
注：限時90分鐘、另設加一

熨烤達人
地址：旺角洗衣街147號地下 
地址：元朗西菁街23號富達廣場地下29號舖

文：Joy