有平有貴 10間吸睛吸like海膽食店

海膽呢家嘢，第一次接觸嗰陣，好多人都會覺得佢個賣相唔討好，之但係，當你試咗第一啖之後，就好容易畀佢嘅鮮甜同獨有嘅creamy質感吸引咗，忍唔住再食第二啖、第三啖……而細細個以嚟嘅認知都覺得海膽係屬於偏貴嘅食材，同埋唔算話周圍都好易搵到好食嘅嚟食。不過，最近，唔知係咪愈嚟愈多人鍾意食海膽呢？我見到愈嚟愈多地方都有得食喇，而且價錢仲有平有貴，款式亦唔再只係得海膽壽司或者海膽炒飯，連海膽熱狗、扇貝乜乜乜都有喇！

平民價選擇

卷之屋

Photos by 卡門吃遍香港的養豬日誌 & Britney Wong
眾所周知，葵涌廣場係一個平民嘅美食天堂，係就係迫人啲，但咁多年嚟都有好多掃街美食，其中一間就係賣手卷為主嘅。純海膽手卷又有、海膽搭配其他魚生嘅都有。25蚊嚟講食到一條其實真係算幾平，不過期望唔好太高，啲海膽未必食到底都仲有。

壽司安日式料理

Photos by ricericemilo & ZOEKAN94
同樣位於葵涌廣場，呢間新開嘅日式料理，有丼飯都有手卷，海膽壽司嚟講都有幾款，最平嗰款大約29蚊有交易，就咁睇都見到啲海膽係一個密舖平面嚟嘅，都幾多。夾住幾條青瓜絲，紫菜都脆，但啲海膽就未必算好鮮甜喇。但如果口痕想食，平平地買條止下癮都幾好。

勁回味

Photos by ykh0404 & cafchiu
繼續係排隊外賣邊行邊食嘅海膽手卷，呢間係喺尖咀嘅，最平嗰款25蚊，咁當然都係最普通嗰款啦，最貴嘅就係50蚊嘅加拿大海膽手卷。都真係幾足料㗎，疊到滿一滿，而且都幾甜，加拿大嗰款仲好creamy添。不過因為全部手卷都係即叫即包嘅，想食呢，就要畀啲耐性排下隊，等下喇。

松坂庫

A photo posted by Yanna 🐽🐷 | 712 🎂🎉 (@ooonly4food) on Jun 21, 2016 at 5:57am PDT

呢間本身係一間零食店嚟嘅，有好多日本入口嘅零食賣，之前仲會喺舖頭度賣埋雪糕添。不過最近就加咗個壽司吧，有師傅喺度即場喺度整㗎，$45條。用嘅係馬糞海膽，海膽味都幾濃郁。

中間價

EC Kitchen

Photos by mrfoodies & DesireforFood
漢堡包愈變愈多花臣，你哋好可能都已經聽過，甚至食過啲鵝肝漢堡、軟殼蟹漢堡咁，而呢間餐廳嘅招牌漢堡，就係……海膽黑松露漢堡！盛惠90幾蚊。不過呢個價錢其實都算抵食，因為佢塊漢堡係人手打㗎，功夫嘢嚟。除咗漢堡，佢哋最近仲出咗海膽薯條。好邪惡，海膽之外仲有肉醬同半溶芝士！

塔門仔海膽燒

Photos by mrs.pig & Pandawing1124
喺佐敦新開冇耐嘅串燒店，啲海膽係由塔門運嚟嘅，然後製成嘅菜式有海膽汁焗扇貝、燒虎蝦（海膽汁）、海膽焗多士、流心海膽大菇、海膽炒飯……全部都個樣好似好吸引咁，個海膽飯仲係成隻鑊咁上。不過海膽就唔算話好多。但舖頭比較細，而且每樣嘢都係即叫即燒，都要預返啲時間等。

新惠和

Photos by donkey-thin & Deedeelau
呢間就真係喺塔門嘅餐廳嘞，最出名一定係海膽炒飯，成100蚊一碟飯，材料就係得蛋、海膽、蔥同飯，不過佢又真係炒得好香喎，海膽甜得嚟有微甘，而且份量都幾多。唔想食飯嘅，叫碗海膽煎蛋麵都OK。啲海膽喺邊？咪畀隻蛋包住咗囉，但講真，鮮味一定冇咁突出㗎喇，但蛋同海膽嘅味都幾夾。

八寸酒食-串燒-私房料理

Photos by sugarcat
呢間日本餐廳，以串燒為主，其中有道接近必試嘅菜式叫「元貝海膽漢堡」。聽個名你可能以為咪又係漢堡。但少年唔好太天真，佢所謂嘅漢堡，係取其形咋。底面嘅「包」其實就係元貝，即係帶子，而中間嘅「漢堡」就係海膽！即係元貝包海膽，再夾多塊紫菜一齊食，啲海膽多到漏出嚟，盛惠88蚊。間舖開到凌晨兩點㗎，宵夜食呢啲都咪話唔邪惡！

高級價

富士山55-拉麵沾麵專門店

Photos by cutely3001 & hkeateriespot
呢間沾麵店最近又再次推出期間限定嘅海膽沾麵，齋睇個樣都真係幾吸引，成三大塊嘅海膽舖咗喺面，仲有多半隻半熟蛋同三文魚子，加埋個湯底係特製嘅龍蝦湯，成個枱面都橙橙黃黃咁，好吸睛。海膽爽身、麵質彈牙、湯底味濃，最後淨咗嘅湯底仲可以追加芝士撈飯，大約200蚊落樓，抵唔抵食就見仁見智喇。

s2-kitchen

Photos by joey0914 & 為食mojil
海膽可能本身都已經聽過呢間嘅11層海膽杯，400幾蚊杯，有燒白飯魚脆片、黑魚子、沖繩海葡萄、藍鮨呑拿拖羅、三文魚子、白蝦、松葉蟹肉〉鮮海帶碎，仲有3層北海道紫海膽，成杯都好有鮮味。不過唔知你哋知唔知，佢哋最近有新作？係「日本婆海膽熱狗」呀。就咁睇，同普通熱狗差唔多，都係有個包夾住條腸，不過係面頭多咗啲海膽，同埋沙律醬變咗芝士醬啫，但食落，原來中間仲有少少辣嘅麻婆豆腐同肉碎呀！係特別嘅，而且出奇地，幾match廚。

文：Kar

隨時接收最新資訊
讚好OpenRice專頁！