忙到死又要抖下,得闲到喊就更加要搵下嘢做,3点3,食个tea呢支歌仔,几时都啱唱嘅。最新4间餐厅嘅下午茶介绍返,有盛夏鲜果,有美肌蜂蜜,仲有重口味榴槤。
呢间喺铜锣湾商场入面嘅米芝莲星级法国餐厅,环境固之然靓,以夏日森林鲜果做主题嘅下午茶同样精致。
三层架总共有5款咸食,其中最吸引嘅就系松露龙虾配蛋黄酱,成大片松露㗎份量好足,龙虾肉结实而鲜甜,一啖放晒入口系幸福嘅。
而成大个木箱装住嘅甜品就更加一众女生们嘅重点,个盒好靓,舖咗「草地」同野餐格仔布,啲甜品的的式式又造型精美。插住嘅白朱古力棒棒糖,原来系中间系成嚿菠萝嚟。西瓜样嘅马卡龙,食落就发现系士多啤梨味嚟,唔算太甜而杏仁味香,唔错。啫喱系柠檬茶加芦荟。
侧边两粒炸黑朱古力冬甩要小心食呀,咬开都几多朱古力酱,dark dark地。不得不提嘅系两款松饼,原味同提子味,够晒松软,牛油味亦非常香浓。成个tea set份量都唔少晏,建议真系有心食嘅,前一餐lunch就唔好食太多嘢喇。
供应时间:
平日:3:00 – 5:30pm
星期六、公众假期:3:30 – 5:30pm
价钱:HK$268(一人份)、HK$518(二人份)
美肌蜂蜜 廷廊
尖沙咀有酒店就同护肤品牌合作,推出咗个蜂皇精华蜜下午茶,各款嘢食都加入香港有机场嘅蜂蜜,包括龙眼蜜、荔枝蜜同常春藤蜜等。上架仲系用特制蜂巢形点心架添,由视觉到味觉都甜到入心。
本身已经甜嘅马卡龙,加埋黑朱古力同蜂蜜,就更加啱晒甜魔喇。至於朱古力迷嘅最爱,应该就系用荟萃咸焦糖、蜜糖朱古力、牛奶朱古力制嘅迷你馅饼嘞。另外仲有用伯爵茶奶油、蜂蜜、香橙啫喱层层叠整嘅Honeycomb。唔止甜嘢呀,咸食都加蜂蜜。好似薰衣草蜂蜜烤鸭胸配青瓜及车打芝士三文治咁。
供应日期:即日起 至 9月30日(逢星期四到日)
价钱:$348(一位价)、$598(两位价)
备注:同场加送法国娇兰Abeille Royale殿级蜂皇系列礼品套装及专业护理服务,如眼霜等
泰式鲜果 Amazing
泰式下午茶都有介绍,仲系自助餐嚟添,无论咸甜嘅嘢食,都加入生果嘅元素,好似炭烧猪颈肉荔枝金不换米纸卷、荔枝肉碎生菜包、青木瓜田园沙律等,夏天食够晒爽。甜品方面,有雪糕鸡蛋仔!自助餐食鸡蛋仔?可以试下呀,新味嚟呀,阿华田鸡蛋仔喎,仲可以自己加雪糕同toppings。锺意食榴槤嘅就有榴槤冰皮卷拣。
供应日期:即日起至8月27日(逢星期六、日及公众假期)
供应时间:下午3时至5时
价钱:$188(成人)、$128(小童)
榴槤飘香 The Market
最後压轴介绍嘅就系果王榴槤!尖沙咀呢间酒店即将推出榴槤甜品下午茶,特别拣咗马来西亚嘅新鲜榴槤,制成唔同甜品。当中最吸引嘅系榴槤炸弹,外表睇落好似无乜特别,但咬落外皮香脆烟韧,里面嘅榴槤蓉非常香浓。
而卖相精致嘅D24闪电泡芙同层次分明嘅斑兰榴槤千层都非常考功夫,特别系千层蛋糕制作方法有啲似日式嘅年轮蛋糕,需要逐层烤焗。
下午茶Set仲有槟城白咖啡榴槤卷、榴槤焦糖布甸同精选马来西亚榴槤肉。全部榴槤都由马来西亚每日空运到港,保证新鲜。
供应日期:8月7日至8月18日(逢星期一至五)
供应时间:3:15 - 5:15pm
价钱:$298(两位起,预先付全额费用可享折扣优惠)
文︰Kar、Cathy