最代表香港的八种面面面面面面面面
2016-04-19
有啲人成日话:平嘢好冇嘢!喺香港地食餐饭,你可以闲闲地畀几千蚊食鲍参翅肚又得,但系用十零廿蚊食碗面,都一样可以食得好滋味!如果我话你听,以下呢8种面系最代表到香港嘅面,你哋服唔服气先?

云吞面


Photos by clarisssssss / 永华面家

想当年,云吞面由广州红到落嚟香港,由一班西关大少嘅宵夜变成今日平民嘅恩物。一碗细蓉,三、四粒鲜虾(猪肉)云吞、一壳鱼汤,浸住幼滑嘅面线。传统嘅云吞面仲要系人手压制嘅竹昇面,爽口弹牙,一咬就断,够晒烟韧。

牛腩面


Photos by Peirina Chen / 九记牛腩


香港传统嘅牛腩面系用柱侯酱煮成嘅,不过近年已经慢慢变成清汤腩或者咖喱牛腩,但依然无损牛腩面喺香港人心目中嘅地位。半肥瘦嘅牛腩,啖啖肉好好咬口,再索晒用牛骨熬制嘅老火汤底,非常入味,面底弹牙得嚟又有啲油香,锺意嘅配个伊面底都系一个唔错嘅选择,而同样索汤力强嘅萝卜就成为伴住牛腩面食嘅最佳食材嘞。

车仔面


Photos by shuki cheung / 荣记粉面


车仔面之所以叫车仔面,系因为最初喺50年代嘅时候,有好多小贩都系推住架木头车、铁皮车喺街边摆档,车上面有得渌面同埋即席煮熟埋其他配料,系一种好平民好平民嘅面食,到後嚟先至慢慢入舖。一碗车仔面大大碗,抵食就抵食就佢啲餸舖满晒成个碗,猪红萝卜猪皮牛丸鱼蛋牛肚肠仔……缺一不可,而且全部都系平民化嘅嘢食,最多啲牛腩同鱿鱼贵多少少,但全部合埋一齐就变到好丰富好好食!识食一定系加腩汁或者咖喱汁咁食!

虾子捞面


Photos by =架架面= / 刘森记面家


而家唔系净返好多餐厅有虾子捞面食喇,用全蛋面整咗个幼面底,韧韧der,再加入炒到乾身嘅粒粒虾子,咸咸香香,好有口感,啲虾子当然愈多愈好啦。就咁净食一个面底又得,配餸云吞又得,点埋蚝油嚟食又系另一番滋味。通常餐厅都会配多碗清汤,等食客食到口乾嗰阵就可以饮返啖汤,再食!

豉油皇炒面


Photos by 渺渺Mel / 陈根记


通常喺酒楼、茶记、大排档或者粥舖都可以食到嘅豉油皇炒面,配菜唔使好多,最简单嘅就系加一堆韭菜、芽菜、葱,落镬连埋生抽、老抽等等豉油炒到佢香一香就可以上碟,当然,加多少少火腿呀海鲜呀咁炒都一样得嘅。炒出嚟成碟面都系豉油色,其实已经好够味,不过有重口味嘅朋友会锺意落埋甜酱同辣酱捞匀再食,层次又再多多几重!

炸酱面


Photos by Benni & 好到底面家


好多地方都有佢哋自己嘅炸酱面,而港式炸酱面主要系用豆瓣酱同蕃茄酱整出嚟嘅,再混埋啲肉丝放上生面顶,捞匀嚟食,辣中带甜。面底同样都系充满蛋香味嘅全蛋面多,混酱中嘅肉丝,最好就系唔肥唔瘦,咬落爽口,愈食愈开胃!

公仔面


Photos by keithkkku & 炳记茶档


讲到香港嘅面食,点能够唔提茶记嘅代表:公仔面。几分钟就可以煮熟嘅快熟面,一向都系快餐同茶记嘅首选。公仔面好易煮,就咁摆入滚水度渌熟就得,但系要煮得好就都好考功夫,太生或者太熟都会影响到面质唔够爽口。公仔面可以话系百搭,餐肉、肠仔、鸡翼、猪扒、鸡扒、沙嗲牛肉、五香肉丁、雪菜肉丝、鸡蛋、火腿等等点搭都得,除咗汤公,仲可以捞公同炒公仔面,完胜!

零食面


最後最後,零食面绝对系香港嘅长青面,由你细细个食到而家都仲系咁锺意食,而家新一代亦都系继续食紧佢哋,无论喺学校定系公司,口痕嗰阵都锺意拎返包嚟食。即开即食,锺意倒出嚟逐条逐条咬又得,成包倒落口过下瘾又得,都系咁脆卜卜。系重味精,但真系好好食!

数住咁多先,唔知你最锺意食边种。但无论边种都好,重点系每一款面食,平得嚟都真系好好食,好有香港嘅味道!喂,你肚唔肚饿呀?煮个面你食啦~

文: Kar

随时接收最新资讯
赞好OpenRice专页!

关键字
云吞面
牛腩面
车仔面
虾子捞面
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
【当时得令】澳门新桥区宵夜之选
2017-01-31
【编辑推介】继续悭家觅食:下环熟食中心
2016-09-21
【编辑推介】平靓正之选:佑汉熟食中心
2016-08-22
够麻甩够地道 元朗4间香口车仔面店
2017-02-22
一个人喺太子食乜好?
2017-05-04
【当时得令】白鸽巢周边平民好面食
2016-12-29
餐厅资料
更多
收起
本月热门
【随时更新】零食速报 每周新款零食、酒品点评
3天前
至甜初夏 6月下午茶推介
2020-06-15
甜蜜蜜暑假 7月下午茶推介
2020-07-03
送A4和牛拼盘!最平$298任食两小时 铜锣湾新开鬼怪主题日式烧肉放题店
2020-06-22
【7月生日优惠】免费食酒店晚餐.免费粥底火锅
2020-07-02