燒味始終都係唔少人嘅comfort food吖，覺得食燒味好老旺角商場food court新開嘅Oh My Goose!就係非一般燒味店，將招牌燒鵝加創意變成一道道新派菜式，食厭普通叉雞飯，呢度有啲驚喜喎。
以燒鵝做主打，大廚林師傅曾喺深井陳記燒鵝工作，之前亦於尖沙咀高檔中菜六公館掌勺，創意無限。最貼近潮流嘅一定係呢款鐵板10x芝士叉鵝飯！冇錯係有人歡喜有人憎嘅拉芝，不過其實唔錯。炒底飯加上燒味，加入兩款芝士燒香，芝士溶到好似溶岩咁，夠晒香口。
鐵板10X芝士叉鵝飯 $48
接受唔到拉芝咁重口味，燒鵝瀨粉夠晒傳統喇。燒鵝係店內自家製作，用5斤左右黑鵝，經醃製、上皮、等工序，食落肉滑又唔會過鹹。師傅教路，鵝背同鵝腩先係最好食。
燒鵝瀨粉 $58
叉燒都做得唔錯，用本地脢頭及豬中肉炮製，黯然銷魂飯有燒再加上煎得好靚嘅雞蛋，配上用新加坡名牌廣祥泰調製嘅甜豉油，一篤穿嬌艷欲滴嘅蛋黃，蛋漿加埋豉油，又香又滑。仲有用北海道牛乳炒成嘅滑蛋叉燒飯，簡單得來又好食。
黯然銷魂飯 $52
北海道牛乳滑蛋叉燒飯 $45
油雞白切雞食到悶？試吓呢款黑松露手撕雞配荵油飯，鮮綠色嘅飯加入紅葱頭煮成，係全天然可以放心食。雞肉加入五指毛桃煮，再混入意大利松露醬、松露油，菌香勁出，食落有葱香、菌味，都幾特別。
黑松露手撕雞葱油飯 $48
揚州炒飯？睇真啲，唔係飯係意粉嚟架！米型意粉更有嚼頭，口感煙韌，同埋炒蛋、叉燒等，更特別加入蝦頭油，好似揚州炒飯但更香更有口感。
揚州炒米型意 $52
地址：旺角亞皆老街8號朗豪坊L4層F1號舖
文、相、片：Perrins