想喺澳門搵下啲和風小店？以下3間絕對值得一訪，有啲更係全日唔同時段有唔同主題食品供應，日頭去同夜晚去會有唔同feel呢~
兩層高日式Café GOOD & ACME
圖：餐廳IG
外面水泥工業風而裡面走木系和風嘅café，樓高兩層，唔同時段去都有唔同嘅感覺。午市供應定食，下晝主打咖啡同甜點，夜晚更有自家Cocktail，咖啡選用自家品牌ACME Coffee Roaster嘅咖啡豆，無論係做Affogato或者配雞蛋布甸都唔錯。和風定食有唔少選擇，可惜分量有啲細，大胃王朋友可能要叫多少少。
復古喫茶屋 白日
圖：餐廳IG
史山斜巷呢間小店裝修走日式佗寂同復古風，瞬間好似入咗時光隧道咁！日間係喫茶店，可以單點或者自選前菜、主食、甜點同飲品組成套餐，蛋包飯、昭和風布丁、舒芙蕾都好受歡迎。晚市就主打火鍋，最近佢哋就有九州博多華味鳥雞白湯鍋套餐，包自家雞白湯、華味鳥雞肉、北海道黑豚、配菜拼盤等，非常豐盛。
健康日式便當店 日玥
圖：餐廳IG
新口岸上海街呢間小店主打日式便當，特別請營養師精心設計，務求菜、肉、飯比例得宜，選用日本無菌雞蛋、優質橄欖油同珍珠米製作，色彩豐富，好睇好味又健康！如果減肥中亦可以要求多菜少飯，配埋杯養生花茶啱啱好。逢星期五、六更有用日本直送材料，用10個鐘熬煮湯頭煮出嚟嘅關東煮，下午茶一流。