日本过江龙寿司店推$720十八道菜Omakase 必试烧大拖罗刺身、深海赤鯥寿司(有片)
2020-03-12

呢间来自大阪嘅日本过江龙顽固寿司,首间香港分店早几个月已进驻尖沙咀,人气有增无减!餐厅超过九成以上嘅食材,由时令海鲜、日本酱油、面豉等调味,均由日本直接入口,务求令食客体验到正宗日本风味。最近仲推出由日籍主厨Muneta主理嘅晚市厨师发办套餐,$720就食足18道菜,都咪话唔抵啊!


晚市厨师发办套餐($720)

厨师发办套餐融入咗怀石料理元素,包括三点前菜、茶壶汤、刺身、寿司、烧鱼、时令料理、茶碗煮等共十八道菜。以每次三件嘅形式呈上,分成三轮,中间穿插汤、熟食等。温馨提提大家会根据时令而供应不同食物~


前菜包括萤光鱿鱼配醋面豉、菜之花配Wasabi酱油及烧平贝配山椒叶酱,等大家开个胃先。之後樱花𩶘鱼土瓶蒸加入𩶘鱼及三种日本菇,包括本菇、冬菇及鸡脾菇,味道偏淡,清清味蕾预备食下一道菜。


刺身一嚟先上个海螺配蜜柑啫喱,味道清新。跟住就到香港人至爱嘅烧大拖罗,大拖罗入口即溶,而且有别於以往点日本酱油嘅食法,配上七味酱及柚子胡椒酱,味道更有层次感。


三款寿司平目鱼、中拖罗寿司及深海赤鯥,赤鯥属於高级鱼,鱼味浓、油份重以及较腍身。


食寿司中间穿插鮟鱇鱼肝配梅七味酱及樱花虾天妇罗+山菜,食客可以转换吓口味。


针鱼配紫酥叶,多咗紫酥叶香气,比较清新及爽口。鰤鱼腩轻轻烧过,配上萝卜又无咁腻,仲有加上金箔嘅白虾寿司添~食完呢三款後又会上个金目鲷樱花蒸畀大家清清味蕾。


跟住到烧左口鱼寿司、北海道马粪海胆及柚子大根寿司,最後的柚子大根寿司味道清新,畀大家可以一解食多咁多味菜嘅腻感。


呢个鸡蛋玉子烧将虾、白身鱼、蛋同淮山打成蓉,再将蛋白打成泡後拎去焗,口感偏向似蛋糕。最後食埋个甜品黑糖蕨饼可谓完美的一餐!


晚市寿司12贯($320)

另外晚市都有单点嘅寿司套餐,如呢个晚市寿司12贯就可以食齐牡丹虾、北海道马粪海胆、鰤鱼、鳗鱼、三文鱼子、帆立贝、平目鱼、吞拿鱼中拖罗、吞拿鱼大拖罗、金目鲷、葱拖罗卷及玉子烧,啱晒咩都想试嘅朋友!


至於午市,除咗有寿司套餐外,都有丼饭选择㗎~好似海鲜丼定食($198)及鳗丼定食($138),仲会跟一个茶碗蒸、小鉢及味噌汤,午市想食好西都无问题!


顽固寿司

地址: 尖沙咀河内道18号K11购物艺术馆1楼106号舖







文: Yanica

相、片: Tom Li

关键字
尖沙咀
日本
过江龙
寿司
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【随时更新】最後倒数!即将结业的老字号及人气小店
2020-05-19
【随时更新】零食速报 每周新款零食、酒品点评
4天前
全城抗炎!人气酒店自助餐重开 每位送鲍鱼、带子
2020-05-11
全城抗炎!喺屋企做大厨 懒人煮食包/套餐集合文
2020-05-13
4月份好评餐厅十强
2020-05-07