又有人氣日本過江龍抵港！今次係有「日本第一天丼」美譽嘅天婦羅丼飯專門店，香港分店沿用日本進口秘制醬汁、日本進口胡麻油，同日本進口天粉。新鮮炸好嘅天婦有唔同配搭，包括約30cm長嘅穴子魚、流心又香口嘅溫泉蛋、多汁飽滿嘅炸舞茸等等。
 

金子半之助總店位於東京日本橋，香港首店就開喺葵芳新都會廣場。品牌主打江戶前天丼，顧名思義係用咗到江戶時代嘅丼飯醬汁秘方，再配搭優質食材，因此連續5屆榮獲日本全國天丼金賞！而香港店用嘅穴子、蝦等食材嚟自同日本金子半之助店相同嘅供應商，香港員工亦遠赴日本研習，取得天婦羅師嘅資格！
 

江戶前天丼（$138）

招牌天丼，有齊穴子、鳳尾蝦、帆立貝魷魚天婦羅餅、溫泉蛋、海苔，同莢豌豆。穴子即係星鰻，比一般鰻魚肉質纖細而且脂肪較少，加上柚子解膩，食起嚟更Light更健康。而且呢度嘅穴子有差唔多30cm長！
 

次序方面，餐廳建議係先聞一下古麻油獨特嘅芝麻香氣，然後食穴子、鳳尾蝦、再試加入重現江戶時代秘製醬汁嘅飯粒，食到一半再篤穿溫泉蛋，撈埋裡面嘅半熟蛋汁一齊食，無論口感定香氣都再提升。
 

上天丼（$118）

呢碗就有鱚魚、鳳尾蝦、帆立貝魷魚天婦羅餅、溫泉蛋、海苔加莢豌豆。餐廳從日本引入天婦羅專用嘅器材，可以用高溫200度炸天婦羅，亦令鱚魚肉口感保持柔軟。順帶一提，套餐包括味噌湯、漬物，同黑豆茶，特別係黑豆茶可以幫助解膩消脂呀。
 

 

天丼（$98）

最平嘅天丼就有舞茸、鳳尾蝦、帆立貝魷魚天婦羅餅、溫泉蛋、海苔，莢碗豆。炸舞茸香氣獨特，多汁飽滿。細節非常講究，例如天婦羅用嘅係日本小麥粉，連裝嘅碗亦以源自江戶時代嘅陶瓷工藝佐賀有田燒製作，雙層碗底中空設計有助保溫。
 

金子半之助
地址：葵芳興芳路223號新都會廣場1樓107-108號舖

文、相、片：Cathy