日式炸鸡元祖店 天下鸟登陆大埔 多达15种酱任拣任配 (有片)
2019-05-06

有冇食过女子汗味同女子脚味嘅炸鸡?我都未。但日本有间人气炸鸡店推出过呢两款味,听讲即系柠檬、芝士等混制而成嘅酱汁,而呢间店最近嚟咗香港开分店呀!不过就好可惜,冇带埋呢两款味过嚟咯,但都有成15种新奇嘅炸鸡酱口味选择,好似大根蓉柚子醋、山贼酱呀咁,啱晒锺意扫街嘅朋友。

炸鸡店「天下鸟」喺日本有超过40间分店,仲曾荣获日式炸鸡大赏最高金赏。香港分店则选址大埔一田超巿内,采用日本博多鸡,以鸡胸肉为主,唐扬粉亦系嚟自日本,即叫即炸。只只都热辣辣,即食嘅话就可以食到香脆嘅口感。不过,食鸡之意除咗在於只鸡外,拣啱酱汁仲可以提升整体嘅层次同味道。

15款酱包括明太子蛋黄酱、咖喱蛋黄酱、大根蓉柚子醋、柚子醋蛋黄酱、特色盐味酱、芥末蛋黄酱、哈瓦娜辣酱、泰国甜辣酱、天露大根蓉、山贼酱、章鱼烧酱、塔塔酱、芝士酱、卡邦尼风味酱同埋照烧酱,咸甜酸辣都有,任君选择。

明太子蛋黄酱就最咸香惹味,仲有粒粒明太子咬到;塔塔酱酸酸甜甜咁都好开胃。

想要有多啲口感嘅就推介可以试下大根蓉柚子醋,啖啖萝卜蓉有阵清甜感,食多几嚿都好似唔觉太腻咁。

至於食得辣嘅朋友(温提,系坚食得至好),不妨挑机哈瓦娜辣酱,唔好睇轻佢橙橙地色嘅酱汁好似冇乜料到咁,食落就知好坚,坚在嗰种辣唔系落到喉咙先feel到,而系由条脷开始辣出嚟,就算食完成嚿,阵辣味都仲喺口腔内萦绕一段颇长嘅时间,够晒刺激。

带多个好消息畀大家,日本章鱼烧连锁店はち八(88)亦同时一齐开业。呢间章鱼烧店来头都唔细呀,系大阪米芝莲推介小食YAMACHAN嘅姊妹店。

章鱼烧用料同制法都同日本一样,而佢哋最大嘅卖点,就系咬开粒章鱼烧,就只系得一粒比平时大粒好多嘅真‧章鱼,但就冇晒啲菜呀昆布呀之类嘅佐料。原来系制作时,已经预早将蔬菜、生果、昆布等材料加入汤料内制成浆,食嘅时候一嚟可以冇咁论尽,二嚟可以更专心咁食出章鱼嘅鲜味。同样都系即叫即制,外皮微脆,章鱼弹牙有嚼劲,最紧要系唔会成口粉嘅感觉。

酱汁有原味、88特色酱、蛋黄酱同明太子蛋黄酱等6款口味选择。其中88特色酱加入多款蔬菜等制,味道微甜。

除咗炸鸡同章鱼烧外,舖头都仲有其他炸物,例如炸广岛蚝、炸鸡软骨、炸鸡皮等等,仲提供炸鸡便当,方便各位无饭大大呢~



天下鸟はち八(88)
地址:大埔超级城B区1-2楼一田超级市场


文、相、片:Kar


关键字
大埔
炸鸡
日本菜
过江龙
章鱼烧
扫街
新店直击
走在最前线,为大家搜罗及报道有关新开餐厅的资讯。
餐厅资料
本月热门
情人节去K11 MUSEA 一文睇晒浪漫餐厅
2020-02-06
【随时更新】零食速报 每周新款零食、酒品点评
4天前
全城抗炎 与医护同行!提供医护餐饮免费优惠餐厅一览
2020-01-31
全城抗炎!卫生保障 推行防疫措施餐厅一览
2020-02-07
美国人气肉桂卷抵港!烟韧原味/朱古力/焦糖胡桃卷(有片)
2020-02-06