日卖万个台湾蜂巢可颂登港!12款口味全介绍(有片)
2018-09-15

呢个夏天有唔少「台」风袭港,最新嘅系总店喺台中,主打切面呈蜂巢状可颂(Croissant)嘅八月堂!喺台湾非常受欢迎,最高纪录每日卖出超过一万个!香港首店会供应11款常设口味,加1款期间限定口味,每日现场烘烤,即睇开饭仔直击介绍啦。
 


八月堂香港首店选址太古AEON STYLE,半开放式设计可以见到可颂新鲜出炉。为咗令大家喺香港都食到同台湾店一样嘅味道,可颂面团会从台湾运到香港,所以能够坚持品牌严选世界优质食材嘅精神:选用欧洲顶级牛油、日本百年品牌面粉,同ISO认证鸡蛋。
 


面团嚟到太古店後需要放喺温室发酵,再每日现场烘烤,当中都有严格标准控制品质,例如发酵嘅时间、温度同湿度都要控制好,可颂焗好先会有完美蜂巢组织。发酵後面团同出炉後嘅可颂都有体积标准,太大或太细都会影响口感所以唔会贩卖。出炉嘅时候牛油香仲非常诱人!
 

香港店特别口味



冲绳黑糖($22)

太古店会售卖11款唔同口味嘅可颂,必试嘅一定系呢款太古店限定嘅冲绳黑糖!即系话全港得呢间店有得买咋,酥脆可颂上面系日本农协JA认证嘅顶级冲绳黑糖酱。
 


食落黑糖天然甜香浓郁,同外酥脆内松软嘅可颂又几夹。食到中间有核桃粒同橘子酱增加口感同味道层次,令人觉得食完一个都唔会太腻。
 


相思卡士达($22)

香港店第一个期间限定口味!同台湾店一样,香港店都会不定时推出期间限定口味,保持新鲜感。
 


相思代表红豆,而卡士达即系香港人叫开嘅吉士,吉士嘅香滑加上红豆嘅甜香同样讨喜。
 

三大皇牌口味


红粉恋人($18)

喺台湾有三款口味特别受欢迎,创出单月卖出超过18,000个嘅记录!当中包括最受女生欢迎嘅红粉恋人,可颂加上士多啤梨朱古力脆皮同粒粒士多啤梨果乾,闻起嚟就有士多啤梨嘅甜香。食落士多啤梨嘅微酸同白朱古力嘅甜味平衡有致,加上粉红色卖相亦相当抢镜。
 


皇家爵士($18)

朱古力系列另一推介,黑朱古力带少少苦味,加上杏仁粒嘅香脆,配牛油香浓郁嘅可颂非常夹。甜度比红粉恋人低,所以广受大众欢迎。
 


蜂巢可颂($15)

蜂巢系形容可颂切开後,里面组织一格格好似蜂巢咁,咁亦代表可颂食落会有非常松软细致嘅口感。原味可颂更能够品尝到牛油天然香味,亦自己配搭唔同果酱享用。
 

更多【新店直击】:
1. 大馆名师设计蜻蜓酒吧 必饮珍珠奶茶、绿茶鸡尾酒
2. 4cm厚班戟+招牌刨冰抵港!京都人气甜品铜锣湾店直击
3. 「台风」袭港!人气精品火锅店登陆尖咀 必叫靓靓玫瑰松板

 
常设口味逐一介绍


炙烧明太子($19)

咸食口味,唔单止可颂表面,里面亦有抹上咸香有致嘅明太子酱。同可颂嘅牛油香相辅相成。
 


香浓起司($19)

同样系咸食口味,今次系澳洲车打芝士片舖喺可颂上面,半溶芝士唔单止增加芝士浓香,亦增加口感层次。
 


曜黑胡麻($22)

黑色可颂系因为面团加入咗竹炭粉同黑芝麻,切开里面系香滑黑芝麻酱!食落充满芝麻香。
 


迷恋卡士达($20)

可颂里面系吉士酱,咬落会有少少爆浆效果!吉士唔会死甜,而系带少少鸡蛋同牛奶嘅乳脂香,口感顺滑。
 


雪花柠檬($17)

可颂上面嘅白色雪花其实系用新鲜柠檬汁特调嘅糖霜,食落柠檬味道突出,酸味令可颂变得清新同Refreshing。
 


朱古力可颂($18)

同皇家爵士唔同嘅系,呢款朱古力可颂系将朱古力揉入面团当中,所以每啖都有同样香甜嘅朱古力味,朱古力控必试。
 


白色庄园($17)

牛油可颂加上白朱古力脆皮,甜度较高。
 


最後有两点提提大家,第一系太古店新开有特别优惠:即日起至9月21号,每日首30名顾客都可以免费得到一盒6件可颂嘅礼盒!如果攞唔到免费礼盒,亦可以用优惠价$98购买6款可颂。
 


第二点系可颂最好即买即食,以上介绍过嘅四款可颂:冲绳黑糖、相思卡士达、曜黑胡麻,同迷恋卡士达因为有内馅嘅关系,建议两小时内享用。其他口味亦建议购买当日享用喔。
 



八月堂
太古康山道1-2号康怡广场南座AEON STYLE地下G11号舖




文、相、片:Cathy

关键字
太古
可颂
Croissant
牛角包
八月堂
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2020-09-18
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08