新蒲岗Lunch开餐街坊推介
2016-08-17
或者大家平时都比较少去无港铁直达嘅新蒲岗,不过呢个旧区唔单止多工业大厦,其实仲有唔少优质食肆值得大家一试。今次就帮各位为食友盘点一下呢区街坊嘅Lunch推介,由港式抵食茶餐厅到泰式料理,由怀旧捞面到真材实料小食,由米芝莲推介到大家未必敢食嘅虫虫料理都一应俱全!

真·手打牛丸加陈年卤水  成记牛什粉面


图:yatding

旧区特别多心机小店,例如呢间粉面档。虽然店名写牛什,但手打牛丸更值得大家一试,食落唔单止富牛肉味仲相当弹牙,要注意佢唔系塑胶嗰种唔自然嘅弹牙,系扎实牛肉嘅自然有咬口。另外牛筋牛腩本身已经系靓货,加上用陈年卤水卤过,牛羶味同卤水香融为一体,无得输。虽然有街坊话有少少退步,但仲坚持手打嘅心机加返分。

京葱羊肉炒人手拉面  手拉面小厨


图:leotseJ.A.M.

一样系街坊饭堂,呢间卖京川沪菜,开饭仔最推荐嘅系京葱羊肉炒拉面,薄切嘅羊肉唔太羶,加京葱洋葱,同弹牙又爽口嘅手拉面一齐炒,惹味香浓。如果唔钟意羊肉嘅话亦可以点猪颈肉担担面,担担面汤底微辣带花生香,手拉面浸汤柔软但一样弹牙。

最後温馨提示一句,有街坊留意到佢最近无开舖,希望小店系装修,之後继续有好味手拉面供应啦。

平靓正多料火车炒饭  好运泰国美食


图:gordonlee1234yemenikwan

无饭不欢嘅,可以转个场嚟呢间小店食餐平靓正泰国菜,火车炒饭个名听完都可能唔知系咩,其实同西炒饭有啲似,用蕃茄、猪肉、洋葱、蛋等配料炒饭。呢间嘅胜在够足料之余仲有镬气,饭粒粒分明又香口。另外佢地嘅咖喱质素唔错,有青、红、黄三款,青最辣而黄咖喱微辣。想食完全唔辣嘅,仲有泰式海南鸡饭畀你拣。

米芝莲怀旧捞面+细蓉  英记美点小食


图:rollingpanda

又一间传统老店,亦系2016年车胎人美食推介之一。招牌菜系六十年代捞面,其实即系怀旧嘅豉油猪油捞面,猪油系自家鲜榨,香气诱人,而且无油腻感令人忍唔住偶然邪恶一下。而细蓉者,细嘅云吞面是也。呢间老店嘅云吞系金鱼尾,馅嘅虾肉比例较高,咬落清爽弹牙,配埋大地鱼汤底鲜上加鲜。简单平实但叫人满足。

正宗豆花米线+虫虫?  云南人家风味餐厅


图:piggy16Kan Lee

呢间餐厅一如其名,以地道云南家乡风味挂帅,最多人嚟食德胜豆花米线,滑溜带豆香嘅豆腐花,同昭通酱、酸菜、肉碎、米线原来咁夹!惹味得嚟口感丰富,加少少辣就一流。为咗照顾怕虫嘅为食友,呢度无放虫嘅相。不过大胆嘅朋友仔绝对要一试呢度嘅酥炸杂虫,一嚟唔系咁多餐厅有得食,加上如果接受得到嘅话,香脆咸香嘅虫其实有唔少蛋白质㗎。

港式手打汉堡包  贤友茶餐厅


图:吉地鱼

食厌咗美式快餐店嘅汉堡包,不如嚟呢间茶餐厅试下港式嘅手打汉堡包。汉堡包选用同样富茶餐厅风味嘅脆身牛油猪仔包,皮脆内软。手打汉堡扒虽然卖相有啲粗糙,不过食落厚度啱啱好仲要有肉汁,加埋生菜番茄同沙律酱,绝对唔会乾争争。配嘅薯条系粗身波浪纹薯条,有种港式豉油西餐嘅实而不华感。

即叫即整真材实料鸡蛋仔  629鸡蛋仔


图:qooclyoldboy008

如果系细食嘅女士或者Tea Time口痕,不如去呢度买底鸡蛋仔当一餐。呢度嘅鸡蛋仔系皮脆内软,一半鸡蛋糕一半空气嘅口感。除咗原味,仲有期间限定特别口味,之前就系唔少Foodie都大爱嘅香芋,可惜而家因为唔当造已经无卖。下一轮将会系九月推出嘅紫薯或者栗子。而格仔饼就胜在厚身,酱料亦畀得疏爽,花生酱、炼奶、砂糖、牛油,简单满足。

平民米芝莲港式糖水  华园甜品专家


图:herbertsuet_lok

照顾埋甜品当正餐嘅一众甜魔们,喺新蒲岗想食糖水,唔少街坊都会推介呢间获得2016年车胎人美食推介嘅抵食中式甜品店。喳咋相当足料够饱肚,红豆、绿豆、芋头、西米等粒粒好咬口,加上椰奶更显香甜。 姜汁炖鲜奶嘅炖鲜奶相当香滑又富奶香,配唔太辣嘅姜汁仲有暖胃作用𠻹。想再贪心啲可以拣热芝麻炖鲜奶,上层系香滑炖奶下层系幼滑芝麻糊。

随时接收最新资讯
赞好OpenRice专页!
关键字
新蒲岗
牛丸
手拉面
捞面
鸡蛋仔
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
【当时得令】白鸽巢周边平民好面食
2016-12-29
【饮食潮流】预告!3月鸡蛋仔艺术节新口味率先睇 腊肠双重芝士味鸡蛋仔都有?
2017-03-01
【编辑推介】澳门缅甸捞面的代表
2017-04-13
【饮食潮流】真‧勇士!日本士多啤梨蛋糕味捞面嚟咗香港喇!(有片)
2017-02-20
【新店直击】氹仔旧城区都有滋味鱼汤粉!
2017-03-16
【开饭热店大赏前哨战】本地姜VS日韩风 街头小食你撑边个?
2017-04-25
餐厅资料
更多
收起
本月热门
【随时更新】便利店寻宝 每周新品速报
2019-11-29
【2019圣诞】早鸟优惠! 圣诞自助餐推介
2019-11-27
秋风起!5间大闸蟹放题食店集合
2019-11-19
【2019圣诞】年尾叉电 圣诞下午茶集合推介
2019-11-19
【2019圣诞】约会之选 圣诞市集推介
1天前