散水饼派乜好? 5个西饼以外的选择
2017-02-20
今时今日,散水要派散水饼好似已经成为咗常识,唔派嘅话,唔多唔少都会听到啲同事闲言闲语或者周围唱。虽然话真‧散水啫,但呢个世界好细,好难保,有日你哋会再聚头,都好难保,原来佢识你新公司啲同事……当然,派散水饼其实都一种礼貌,叫做多谢返呢班合作过、教过你、(或者跣过你)嘅上司、同事。唔好再问「边个发明要派散水饼」呢啲问完都冇答案嘅问题喇,谂下散水饼派啲咩仲实际啦。

个个都派西饼呀、蛋糕呀、马卡龙咁,系正路呀,不过平嘅又会畀人话cheap,贵嘅又买唔起(其实系唔想买),而且冇啲新意,食得多都闷㗎。特别撞啱啲离职潮,喂,真系隔日食cake都咪话唔滞。其实,边个话散水饼一定要派西饼㗎?派呢啲都得嘅:

泡芙


Photos by fangfiona & bageladdiction

介乎松饼同蛋糕之间嘅泡芙,有松饼松脆嘅酥皮,亦有蛋糕软滑嘅忌廉吉士酱,冻食热食都得。细细件唔会太腻亦唔会太饱,喺散水饼最佳派发时间,即系下午茶时间食,啱啱好。而且每个泡芙都有独立包装,可以逐个逐个老细、同事一人一个,既方便又卫生。原味、朱古力味、抹茶味等等任君选择。

同事开心度:****
自己方便度:****
经济实惠度:***

蛋挞


Photos by dexarrius & 恋食旅人

作为地道嘅香港小食,蛋挞当然有佢一定嘅价值,以及一班忠实嘅fans。散水饼唔买蛋糕,可以考虑买蛋挞。滑嘟嘟嘅蛋加松化嘅挞皮,又有蛋香又有牛油味,而且方便易食,一定唔会食到好逦迤。不过最好就夹啱新鲜出炉嘅时间,热辣辣嗰阵即买即派!锺意嘅仲可以买埋另一款怀旧小食:松软得嚟又有啲脆,外层铺晒砂糖嘅沙翁,而家唔系好多地方食得到㗎咋!重点系,平!如果人工唔太高嘅打工仔,认真谂谂佢啦,诚意搭够呀!

同事开心度:***
自己方便度:***
经济实惠度:*****

曲奇


Photos by 为食奴隶兽 & meal alone

曲奇饼都系散水饼一个唔错嘅选择,识整嘅可以自己整,简简单单得嚟又突显心思。唔识整嘅都可以出去饼店买,多款吖嘛,牛油曲奇、咖啡曲奇、朱古力曲奇等等,好似可以同时间食到几款口味咁都几开心。另外再买啲细细个嘅独立包装袋,几块几块曲奇咁後期自己人手加工包装,更见心意。

同事开心度:***
自己方便度:***
经济实惠度:****

零食


Photos by Winniebb2009 & four_month

直情跳出「糕」同「饼」嘅框框,送零食啦!你认真谂下,平时你office啲同事,个个嘅柜桶都收埋收埋好多零食,无论咩时间都可以喺度食紧嘅。其实送零食一定实用罗,薯片呀虾条呀百力滋呀饼呀朱古力呀糖呀……而且个好处系,唔使好似蛋糕西饼咁,就算饱都要畀面你而即时食,啲零食佢哋锺意摆住喺度几时食都得。自私食又得,开心些牙食又得,咁样就算你派饼嗰阵唔喺office嘅同事一样受惠度,皆大欢喜!你怕你一抽二袋拎唔晒返去?傻猪嚟嘅,可以好似叫外卖咁,叫啲零食送上门㗎!

同事开心度:****
自己方便度:*****
经济实惠度:****

雪糕


图:Haagen Dazs

讲到最开心嘅「散水饼」,当然系送一年四季都啱食嘅雪糕啦!同事又开心,自己又方便,喺是但一间便利店、超级巿场都可以买得到。唔使用脑,每只味都执啲就得,最紧要数返齐咁多个人头咁多只杯啫。不过,漏咗都唔紧要,立马落街补买返!不过系你个荷包痛啲罗。

同事开心度:*****
自己方便度:*****
经济实惠度:**

文:Kar

随时接收最新资讯
赞好OpenRice专页!

关键字
散水饼
蛋挞
雪糕
曲奇
泡芙
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
炸曲奇鱼蛋咩玩法? 铜锣湾曲奇店推烧棉花糖味雪糕
2017-04-03
母亲节约妈咪叹Afternoon Tea!五大下午茶推介
2017-04-25
法式轻甜泡芙Pop-up店登陆尖沙咀(有片)
2017-04-07
4月限定 香港樱花x抹茶甜品祭!
2017-04-03
【开饭热店入围名单巡礼】甜入心之选 城中人气甜品店
2017-02-21
迪士尼新酒店餐厅巡礼 米奇造型甜品最吸睛(有片)
2017-04-28
餐厅资料
更多
收起
本月热门
【随时更新】最後倒数!即将结业的老字号及人气小店
2020-04-01
【随时更新】零食速报 每周新款零食、酒品点评
5天前
全城抗炎! 5间酒店自助餐转型 任点任食海鲜/主食/甜品 变阵保卫生
2020-03-17
【特约分享】超抵外卖陪你抗疫 即睇将军澳饮食地图!
2020-03-10
【随时更新】全城抗炎!多间集团餐厅及老字号宣布 暂停晚巿或休业 (内附名单)
5天前