扫街扫到过大海 期间限定灯光夜巿8大小食推介(有片)
2018-03-20

锺意扫街嘅人类,当然系去到边,扫到边啦!今次就带大家扫到过大海先!话说澳门渔人码头最近有个灯光夜巿,夹夹埋埋都有几十个摊档,烧海鲜、甜品、小食、特饮等等通通都有得食~ 即刻巡个圈先~

咸蛋鸡蛋仔  泽贤记

咸蛋黄应该系今年最红嘅食材!呢档鸡蛋仔有咸蛋味呀,即叫即整,睇住店员真系格格都放啲咸蛋落去㗎!所以整出嚟粒粒鸡蛋仔都食到咸蛋,系就系油就啲啲,肥咗啲啲,但坚系香口,一粒一粒好快搣下食下就冇晒。

芝士章鱼烧

平时朱古力喷泉就见得多,呢档竟然有个芝士喷泉呀!见到都觉得吸引!原来系卖章鱼烧嘅,可以拣烧汁味或者芝士味,咁梗系拣芝士啦~ 啲芝士汁系店主自家调制嘅,不过有啲啲可惜,唔系想像咁将一粒粒章鱼烧当棉花糖咁队入喷泉度,而只系用匙哔啲芝士汁出嚟淋喺面。食落都香芝士味嘅,章鱼烧亦唔会话太粉,都值得一试。

黄金烧松叶蟹盖   盛之沢山

另一样好吸引嘅嘢就系烧海鲜喇,松叶蟹盖呀、龙虾呀等等全部都舖满芝士咁烧,我都唔想用邪恶去形容㗎……但烧到啲芝士变咗半溶状态,热热地咁食,well~

啤啤熊特浓牛乳软雪糕  澳义

见到有雪糕唔系唔食呀嘛,仲要系咁cute cute嘅熊仔头!嗯,用嚟打卡的确系一流嘅,但要快手,溶得都快呀。同埋,佢个名冇呃你,特浓牛乳软雪糕,真心特浓,但同时都偏甜,有啲似细个食嘅白兔糖味,但就唔多够滑。至於个熊仔头,都ok脆口,有少少蛋香味咁。

猪脚姜、花胶响螺翅汤   裕华明记美食

估佢唔到呢个夜巿,竟然有啲滋润嘅嘢食!例如好似有养颜桃胶雪耳糖水、花胶响螺翅汤,都几足料。仲要连猪脚姜都有啊!

鲜味长脚蟹花胶云吞   御品屋

见到呢个名,初初以为系啲云吞皮包住啲蟹肉同花胶咁过瘾?点知少年我真系太年轻,原来系普通正常嘅猪肉馅云吞,只不过系用花胶汤底上,同埋有几撮长脚蟹肉喺面头咁。但平心而论,汤底系甜嘅,云吞皮薄馅多。

樱花渍青柠梳打    I’s Tea

食咗咁多嘢,当然都要搵返啲嘢饮。行靓靓呃like路线嘅朋友,首选应该系呢杯樱花渍青柠梳打喇!面头放有樱花渍㗎,饮落系小清新啲friend。

德国清酒   澳门佳酒

当然,酒鬼可以啤啤佢啦。行匀全场,都有几档卖酒嘅,但就以呢档最为推介。事关佢哋酒款最多,亦最为少见。其中德国嘅呢两只啤酒——清啤同小麦啤喺坊间都较为少见,但质素唔错,清清地,更能突出麦味。另外有其他葡国酒选择。


澳门渔人码头灯光夜巿 详情
地点︰澳门渔人码头(户外活动区)
日期︰即日 至  5月13日(逢周五、六、日)
时间︰周五︰17:30 - 22:30;周六及周日︰17:00 – 22:30
备注:场内系电子消费嘅,可以用澳门通卡(现场即买便可)、MacauPay或者支付宝畀钱


文:Kar
相:Kar、Cathy

关键字
澳门
扫街
扫街热点
小食
芝士
海鲜
雪糕
啤酒
开饭专题
开饭仔为你提供各类型最新饮食情报及优惠,全面照顾你的饮食喜好。
本月热门
【随时更新】最後倒数!即将结业的老字号及人气小店
2020-05-19
【随时更新】零食速报 每周新款零食、酒品点评
1天前
全城抗炎!人气酒店自助餐重开 每位送鲍鱼、带子
2020-05-11
全城抗炎!喺屋企做大厨 懒人煮食包/套餐集合文
2020-05-13
旺角新开花艺Cafe 丰富全日早餐+明太子猫耳朵+特调有机花茶(有片)
2020-05-18