乜嘢係Sool-Jip（술집）？簡單啲嚟講就係韓式居酒屋，唔少韓國人都放咗工後，都鍾意同朋友或同事去Sool-Jip飲杯酒傾吓偈食下酒菜～中環蘇豪區最近都出現咗一間韓式Sool-Jip，主廚及大部份員工都係韓國人，供應自家製韓式傳統菜式及特色調酒，氣氛夠晒道地，開業短短時間已吸引唔少本地韓國人去朝聖！
餐飲部份由韓籍主廚Junwoo Choi主理，曾於香港多間韓國餐廳工作，亦應邀於2018年韓國冬季奧運會嘅宴會為貴賓烹飪。而酒吧部份就由韓籍酒飲總監Daniel Eun負責，佢選用韓國燒酒、米酒及百歲酒創作出六款特色雞尾酒，好有韓味！
和牛牛肉他他（$168）
前菜和牛牛肉他他，選用肩里脊內側肉，韓國傳統嘅生拌牛肉多數淨係加蒜、 洋蔥及麻油等拌勻食，而呢度就加入高湯啫喱、鵪鶉蛋及韓國梨一齊食，味道有層次而且更清新。
韓式甜辣燉排骨（$328）
招牌甜辣燉排骨，加入洋蔥、蘋果、蒜、薑、蘿蔔韓式及韓式辣醬製成醬汁，上枱時侍應會連同迷你爐奉上，除咗排骨仲有大量Raclette熱熔芝士及mozzarella，芝士味同拉絲效果一樣咁足！
韓式去骨炸雞（$108）
講到韓國菜又點少得食炸雞飲啤酒，韓式去骨炸雞配上秘製甜辣醬或蜜糖蒜蓉醬，辣醬加入士多啤梨醬增加甜味，減低辣度，蜜糖蒜香一樣咁惹味。
更多【新店直擊】： |
韓式海鮮煎餅（$128）
海鮮煎餅亦係傳統食品，餐廳加入蝦、青口 及魷魚等海鮮，而且煎餅比起坊間嘅整得更薄身及脆口，配洋蔥醬食就無咁膩～
海鮮辣湯麵（$178）
高級版嘅韓式海鮮辣湯麵，湯底加入牛肉及海鮮熬製一小時而成，香辣得嚟仲充滿鮮味，來自韓國嘅韓式手製麵都好有咬口。
呢度嘅Premium米酒（$180）都好值得一試，特意選用韓國一個好出名生產米嘅地方嘅米酒，米味特別香濃而且好順口。另外Cocktail都係選用韓國燒酒同米酒製成，好特別～
特別一提餐廳嘅入口處比較隱蔽，一行到奧卑利街要先右轉進入一條小巷先行到入去。
地址: 中環奧卑利街3-5號地舖
文: Yanica
相、片: Tom Li