情人节蛋糕巡礼 天然红宝石朱古力、花艺蛋糕大热
2019-02-11

情人节无论系打算出去享受烛光晚餐,定两个人玩煮饭仔,最後当然唔少得要有一个精致蛋糕!今年有蛋糕店以世界第四种朱古力,带天然粉红色嘅红宝石朱古力为主题,另外亦有不败嘅花艺、心形元素等,拣到啱另一半心水嘅就立刻去订啦!
 

红宝石朱古力红鹤 The Cakery


(左)My Princess红宝石朱古力香槟蛋糕($688),(右)Flamingo Cupcake Topper红鹤纸杯蛋糕装饰($30)

优雅嘅红鹤系唔少女孩子嘅最爱,呢间以健康生活为宗旨嘅蛋糕店今年就以红宝石朱古力嘅天然粉红色造出红鹤嘅精致羽毛,食落甜中带酸,里面系无糖白朱古力甘纳许。另外亦有红鹤纸杯蛋糕装饰,可以配搭店中任何一款纸杯蛋糕。
 

红宝石朱古力宝盒 La Famille


(左)Treasure Box($450)(海港城店限定),(右)My Princess($298)

呢个Treasure Box外面系红宝石朱古力,里面红桑莓戚风蛋糕亦配以多款杂莓、红宝石朱古力红桑莓脆脆、红宝石朱古力甘纳许,酸甜犹如恋爱滋味。另外亦有特别版戚风蛋糕My Princess,以红宝石朱古力忌廉配日本士多啤梨同皇冠造型朱古力,甜而不腻。
 

红宝石朱古力杂莓蛋糕 A-1 Bakery


(左)杂莓红宝石朱古力蛋糕($158),(右)红宝石及比利时朱古力蛋糕($158)

想一试红宝石朱古力嘅滋味,仲有呢间连锁日式面包店嘅出品。红宝石朱古力带少少莓果香,所以杂莓红宝石朱古力蛋糕就配以新鲜士多啤梨同流心杂莓果酱,酸甜清新。另一款就以红宝石朱古力忌廉,配以60%比利时朱古力忌廉,双重朱古力享受。
 

【情人节DIY】:
1. 甜品店师傅示范朱古力慕斯 零失败秘诀大公开(有片)
2. 浪漫情人节早餐食谱:梦幻红桑子法式吐司
3. 情人节 DIY:手工生朱古力食谱

 
永生花球蛋糕 SP Flower & Tea room


(左)Make a Wish Ball($498起),(右)My Honey($408)

女士们都锺意收到花,但又觉得鲜花会凋谢好可惜?呢间就推出糅合永生花球同挞饼嘅Make a Wish Ball,食完可以保留花球作为情人节礼物。另一款My Honey更加用双色手工朱古力造出巨型玫瑰花,下面系以玫瑰荔枝啫喱配果香玫瑰慕斯嘅杂莓挞。
 

心形花束蛋糕 Vive Cake Boutique


(左)All You Knit is Love(1磅$600,2磅$1,180),(右)Violet Penelope(0.5磅$460,1磅$640)

All You Knit is Love以Pastels色调为主,上面宛如心形花束嘅装饰相信回令女士们立刻变心心眼。下面蛋糕以粉红同粉紫色忌廉点缀,里面系朱古力海绵蛋糕。而Violet Penelope系淡紫色嘅云呢拿海绵蛋糕,放上钻石形状嘅装饰牌更显高贵。
 

热恋气球蛋糕 Twinkle Baker Décor


(左)热恋气球 Balloon Adore($368),(右)梦幻玫瑰 Rose Fantasy($368)

热恋中心情兴奋好似飘喺半空中?咁呢款热恋气球就啱哂!蛋糕上面有唔同颜色嘅棉花糖,再插上心形气球,非常Photogenic!而蛋糕系朱古力海绵蛋糕配蓝莓芝士慕斯同酸甜蓝莓酱。另一款梦幻玫瑰就用手造玫瑰配粉色朱古力,海绵蛋糕中系黄桃啫喱同伯爵茶慕斯。
 

初恋の香り白莓蛋糕 东海堂


(左)白莓.约定($438),(右)粉嫩.花束($320)

呢间连锁店今年选用日本静冈直送「初恋の香り」白草莓,淡粉红嘅心锥外形配以心形蛋糕最合适!上面有白朱古力片点缀,里面系蛋白蛋糕、士多啤梨果酱同粒粒士多啤梨果冻。而粉嫩.花束即系杂果牛油忌廉手工唧花蛋糕,精致唧花感觉特别浪漫。
 

爱心红丝绒蛋糕 美心西饼


(左)Sparkling Moment($168),(右)Romantic Moment($158)

都话爱心系不败元素,呢间连锁饼店今年主打心形蛋糕,Sparkling Moment系杂莓红丝绒软芝士忌廉蛋糕,三层红桑子软芝士忌廉挤花加上红丝绒蛋糕,内外都一样甜蜜。而Romantic Moment系玫瑰荔枝夹心士多啤梨慕斯蛋糕,水晶镜面嘅立体心形够抢眼。
 

樱桃酒朱古力蛋糕 Chez Shibata

 樱桃酒朱古力蛋糕 ($350)

呢间饼店就系由日本甜品大师创立嘅,佢哋嘅蛋糕出晒名内外兼备。情人节买返个樱桃酒朱古力蛋糕,包你哋啲BB猪加你哋分。呢个cake,用法国特级CEMOI朱古力制,以牛奶朱古力mousse包住红桑子果酱同樱桃酒,浓甜微酸得嚟又香醇,醉人啊。

士多啤梨白朱古力蛋糕 agnès b. CAFÉ

 士多啤梨白朱古力蛋糕  ($48 / $298 / $488 视乎大小而定)

呢个时装品牌同时踩埋入食界,凭甜心朱古力轻易就俘虏到一班女生嘅欢心。情人节梗系要出返个心心朱古力蛋糕啦,士多啤梨奶冻加糖煮士多啤梨,全部都系女生飞佛嘅元素,简直就系甜上加甜。




文:Kar、Cathy
相、片:Kar

关键字
情人节
蛋糕
红宝石朱古力
士多啤梨
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】最後倒数!即将结业的老字号及人气小店
2020-05-19
【随时更新】零食速报 每周新款零食、酒品点评
2天前
全城抗炎!人气酒店自助餐重开 每位送鲍鱼、带子
2020-05-11
全城抗炎!喺屋企做大厨 懒人煮食包/套餐集合文
2020-05-13
【随时更新】全城抗炎!多间集团餐厅及老字号宣布 暂停晚巿或休业 (内附名单)
2020-04-29