悠闲叹鳗鱼全日早餐+精品咖啡 观塘工厦新开花艺Cafe
2019-01-29

观塘又多间舒服嘅Cafe可以去啦!呢个品牌主打精品咖啡同健康料理,最近由鰂鱼涌开到观塘工厦当中,唔单止继续供应鳗鱼全日早餐,仲多咗日式定食同小食。Cafe一角系品牌嘅花艺店,可以一边欣赏鲜花一边叹美食!
 


The ARTlab by Favilla集精品咖啡、料理、花艺同艺术於一身。暂时试业期间午市会供应全日早餐同日式定食,下午茶时段供应轻食同甜品。Cafe一角系花艺店,售卖鲜花、保鲜花、丝花等。而呢度亦有搵唔同Artist合作,好似之前就举办过Instagram人气书法家Typing嘅展览。
 


【和式】全日早餐($128)(转牛角包 另+$15)

鰂鱼涌店热卖嘅和式全日早餐呢度继续供应,一样所有料理不加味精,选用日本鸡蛋,原生态养殖无激素鳗鱼。鳗鱼肉厚弹牙,富蒲烧香味,不过有一两条细骨。
 


味噌炒蛋柔滑而唔油腻,味噌咸香同淡淡蛋香配鳗鱼啱啱好。拍摄当日沙律系南瓜沙律,口感粉糯。而牛角包牛油香明显亦够酥,如果再硬身啲同脆口啲感觉会更讨好。
 


慢煮鸡卷配芥末风味酱定食($98)(加温泉蛋 另+$12)

日式定食暂时有四款选择,日後或会逐渐增加款式。呢款就用60°C慢煮鸡卷,鸡卷用日本鸡肉人手卷成,里面加咗紫苏叶、蕃茄等,配带微辣嘅芥末风味酱。定食会配埋饭、汤同是日沙律。
 


鸡卷口感嫩滑结实,味道就以紫苏香味为主,比较清新。另加嘅温泉蛋蛋白滑溜,蛋黄半熟香浓,加豉油捞饭食就最啱!而且饭本身已经落咗少少芝麻同紫菜,比一般白饭香口。
 


红豆窝夫配绿茶雪糕($68)

14:30起供应下午茶,格仔窝夫外脆内软,配北海道红豆甜度得宜。再配多球Häagen-Dazs抹茶雪糕就更有和风Feel!
 


抹茶挞($32)

另外亦有松饼、蛋糕等轻食,抹茶挞唔会太甜带抹茶清香,略嫌回甘味道唔够突出,死忠抹茶控可能会失望。不过胜在味道清新,而且挞底松化,系一份唔错嘅茶点。
 

更多【新店直击】:
1. 台北麻辣火锅创始店进驻旺角 饮得嘅麻辣汤底配特色配料
2. 一人前日式涮涮锅 铜锣湾Pop Up店食A5鹿儿岛黑毛和牛锅
3. 法国顶级朱古力品牌重回香港!必试全新三款黑朱古力

 


精品咖啡($70)

品牌主打精品咖啡,好似最近用嘅呢款哥伦比亚咖啡豆得过国际咖啡比赛第三名,手冲滴漏後闻起嚟带少少似焦糖嘅甜香,饮落有类似莓果嘅酸味,後韵带甜,口感柔滑颇易入口。咖啡豆会不定期更换,Coffee Lover不妨留意下。
 


伯爵茶柚子梳打($46)

特饮配搭亦有新鲜感,呢杯用伯爵茶搭配柚子蜜,入口先饮到伯爵茶香,之後系柚子蜜嘅清甜,配合气泡口感非常清新解腻。另一加分位系Cafe为咗响应环保,用嘅系纸吸管,当然大家如果可以自携吸管,或者走饮管就更好啦!
 








The ARTlab by Favilla
地址:观塘开源道55号开联工业中心B座6楼602A室
*试业营业时间为星期一至五 11:00 - 18:00




文、相、片:Cathy

关键字
观塘
Cafe
精品咖啡
全日早餐
定食
甜品
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2020-09-18
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08