铜锣湾呢间以日本佐贺县为主题嘅居酒屋,旧年暂时休业後终於重开啦。主题不变但换上全新Menu,以更多佐贺新鲜食材为主题,例如佐贺牛、呼子鱿鱼等。更搵嚟福冈米芝莲一星名店料理长驻港,将名物茶渍饭等带埋过嚟!
必点推介
米芝莲一星店Shiranita秘制 鲷鱼嬉野茶渍饭($88)
佐楽今日(6/6)重开,特别请嚟福冈米芝莲一星京风割烹料理名店西中洲しらに田(Shiranita)料理长冨田耕平先生出任总料理长,呢个鲷鱼嬉野茶渍饭系最出名嘅菜式。用佐贺日和米、嬉野茶,配搭自家调配胡麻酱同天然鲷鱼。
建议先各自试咗胡麻鲷鱼同饭嘅原味,胡麻鲷鱼芝麻香浓厚、鱼肉弹牙滑溜,而佐贺日和米饭粒粒圆润分明、充满光泽,口感软糯富米香。之後将胡麻鲷鱼加到白饭上再倒入嬉野茶,甘醇茶香带有旨味,更可以带出鲷鱼鲜味,鲜上加鲜。
日本水鱼出汁煮汤($168)
日本人觉得酷热嘅夏天需要食帮人增强体力、恢复元气嘅食物,富含胶原蛋白、维他命同氨基酸嘅水鱼就系其中一种。餐厅选用日本养殖活水鱼,先汆水去皮,再用料理用清酒煮两个钟,中间不时要隔走浮面嘅泡泡,先可以令呢份出汁清澈见底。
建议上枱後一滚起就加入蔬菜同麻糬,再滚就趁热享用。带水鱼鲜味嘅蔬菜当然好味,汤头亦醇香鲜甜,不过煮得太耐就会变咸,最好都系食快少少啦。
佐楽名物 熟成免治三濑鸡肉串($48)
佐贺除咗佐贺牛,同样着名嘅有三濑鸡,以法国地鸡混种培育而成,用生米糠同大麦喂饲,脂肪少而富弹性。免治鸡肉本身已经有酱汁调味,再伴以生蛋黄增添湿润口感同味道层次,香味十足!
数量限定 佐贺涌水之雫啫喱($28)
用佐贺泉水制作嘅水滴啫喱晶莹剔透,加上金箔点缀更显高贵。水滴啫喱本身就无任何味道,需要伴旁边嘅黄豆粉,再按自己喜好加绿茶酱或者黑糖酱。啫喱口感滑溜弹牙,而黄豆粉亦相当香甜,同绿茶或者黑蜜一样夹。
佐贺地道日本酒(2小时任饮 $248/位,31/8前特价$188/位)
佐贺有纯净水源同优质稻米,自然亦有出产唔少日本清酒。重开优惠价$188就可以任饮佐贺地道日本酒、烧酎、果实酒、威士忌等等!呢度展示嘅6款佐贺清酒各有唔同特色,好似聚乐太阁 纯米Sparkling就系夏季限定嘅气泡清酒,微酸清爽适合配搭刺身。幸姬 辛口纯米酒就较为辛口,余韵微甜,配搭牛肉等较为油腻嘅菜式就啱喇。
更多【饮食潮流】: |
其他招牌菜推介
SAGAN VEGE 有机无农药蔬菜配一之塩沙律($78)
选用佐贺农家温室直送新鲜野菜、无农药或化学肥料。简单以60℃低温蒸发制作、保留多种微量元素嘅天然海盐「一之塩」提鲜,充分发挥蔬菜天然甜味。
唐津玄海渔协直送鱼鲜七款刺身盛合($298)
唐津玄界滩喺佐贺县嘅西北部,临近有对马海流从东海带嚟丰富海产。餐厅每日挑选时令海鲜再空运到港,特别推荐当中嘅呼子鱿鱼,特别用零下55℃瞬间冷冻技术,减少鲜味流失,卖相通透、肉质弹牙带黏、味道鲜甜。
吉列特上佐贺牛肩肉($248)
佐贺牛系同松阪牛、神户牛并列日本三大和牛,脂肪细腻肉质柔嫩。餐厅挑选佐贺黑毛和牛嘅特上牛肩肉,即系雪花分布最均衡、旨味最浓郁嘅部位以吉列方法炸至约三成熟。保留和牛肉汁,外脆内嫩。
炭烧三濑鸡颈肉 配葱花($78)
猪颈肉就食得多,呢度有少见嘅炭烧鸡颈肉,炭烧唔单止烧走多余油分,更增添阵阵炭火香气。鸡颈肉食落爽口有嚼劲,配葱花可以再进一步减低油腻感。
自家制佐贺酒粕慕丝($28)
用佐贺清酒酒粕、即系酿造清酒是过滤得出嘅白色米浆,制作成慕丝有淡淡酒香,更多嘅系米嘅甜味,非常讨好。
佐楽
地址:铜锣湾霎东街15-21号OLIV 12楼
文、相、片:Cathy