张敬轩餐厅新推皇后下午茶 红丝绒盒珍珠链造型激真
2018-10-12

皇上张敬轩今次唔唱《他的故事》喇,而系讲「她的故事」。边个她?皇后罗,法国18世纪嘅玛丽‧安托瓦内特皇后呀。话说佢湾仔间餐厅听日开始推出全新主题嘅下午茶,就系以呢个争议性大但同时又极度贪靓、奢华嘅皇后做主角,透过一个三层架同「首饰盒」去感受下嗰种皇室生活品味!

上菜前讲下皇后嘅故事先,大家对玛丽皇后最深印象可能就系佢嗰句「Let  them eat cake!」喇。但原来呢句笨唔系真系出自皇后本人把口,只不过系佢一向畀人追求享受嘅态度而被後人「加」畀佢。Any肥,总之呢个皇后就系好鬼锺意珠光宝气、香槟、莓果、甜品同埋花花世界啦。所以今次呢个下午茶,都有唔少嘢食系以花同莓果入馔,兼有好多珠宝元素添。

咁点解拣一个咁有争议性嘅人物去做主角?轩仔话因为皇后同大家一样,生於动荡嘅时代,但喺research嘅过程中发现佢系一个好有taste嘅皇后,喺多变嘅社会中可以搵到自己嘅comfort zone,对生活有追求,对品味有执着,就希望将佢嘅审美同对生活追求嘅精神加入下午茶餐度喇。「我哋本身系法国餐厅,都希望介绍多啲法国文化畀大家。做呢个艺术成分比较高嘅茶餐,本身有佢嘅历史意义,希望大家除咗嚟食好西之外,对历史或者法国文化都会有多啲了解。」

众所周知,逢系轩仔嘅出品,基本上都有古典美同靓样嘅保证。今次「玛丽皇后的首饰盒」主题嘅下午茶都唔例外。成个set一睇就系贵气,样样都咁打卡able。轩仔话三层架嘅顶层系重点,三款甜品都充份表现到玛丽皇后嘅奢华,同埋有几咁识享受。好似玛丽皇后的香槟杯,就系香槟啫喱配荔枝果肉、粉红番石榴果蓉同埋云呢嗱慕丝,甜甜酸酸咁几清新。上面仲有「钻石」同「珍珠」,就连块食用玫瑰花瓣都大有来头,系每日新鲜直送过嚟!

紫罗兰修女泡芙嘅紫罗兰吉士系由法国入口,下层加上黑加仑子果酱,仲有粒粒珍珠同通花蝴蝶(食得㗎都),就咁睇都觉得好精致,食落仲有阵好似香水嘅味道。而打开牛奶朱古力礼物盒嘅盒盖,就会食到里面嘅特浓朱古力脆脆、冧酒提子慕丝同牛奶朱古力慕丝。唔好净系挂住食,望下个盒,好鬼靓,轩仔仲话「如果佢而家在身嘅话,肯定都想跳返起身食呀。」盒上嘅宫廷花样彩绘图案系嗰个年代好兴嘅pattern嚟,盖面用咗皇后侧面嘅链咀嚟做装饰。

中间嗰层系scone,睇落好似相对冇乜特别,但呢层系轩仔最爱,就梗系有佢嘅过人之处啦。「牛油嘅份量或者系面粉嘅发酵程度都会影响scone嘅口感,而我哋呢个真系做到出面脆,入面系烟韧、软熟嘅。」而今次仲特地为咗呢个主题,创作咗士多啤梨乾果玫瑰松饼。

最底嗰层系4款咸点,包括自家制芝士烟肉批、法式萝卜丝批配辣根酱、法式香肠酥卷,同埋三文鱼他他三文治配鱼子酱,呢个三文治系用咗两种唔同配料嘅面包皮,再夹咗啲三文鱼喺入面,加埋香葱,令到佢好香口。

但讲到最最最OP嘅,一定系最後先上嘅「首饰盒」喇。真系成个首饰盒咁㗎。一打开,哗!(真心会尖叫)系成条珍珠颈链呀!唔好误会,呢条系食用珍珠颈链,连埋红丝绒面都食得落肚。「呢条系皇后第一条订造嘅珍珠链嚟,每粒都系水滴形珍珠。亦系佢遗物清单中拍卖价最高之一嘅物件。」呢个玫瑰慕丝蛋糕系糕饼主厨Mandy Siu嘅大作,海绵蛋糕好薄身,淡淡玫瑰幽香,仲有啲糖粉闪令令。至於条链嘅珍珠,就系一粒粒人手制嘅朱古力同糖珠嚟。像真度高到呢~ 今次真系珍珠都冇咁真呀!

 张敬轩与糕饼主厨Mandy Siu

是咪睇到好心动?留意返呢个tea set系逢星期六、日同公众假期先有,每日限量廿份,想食就要早啲上网订定位喇。但听讲暂时booking已经full到去11月头喇……

 同场加映饼店新出法国皇室牛角酥(红桑子、荔枝果肉、玫瑰杏仁馅)|10月17日正式发售


玛丽皇后的首饰盒 主题下午茶
预约网址:www.junon.com.hk
日期:逢星期六、日及公众假期供应
时间:下午3:00至5:30


仙后餐厅
地址:湾仔皇后大道东213号胡忠大厦2楼

文:Kar
相:Cathy、Kar
片:Cathy

关键字
湾仔
张敬轩
下午茶
法国菜
开饭星探
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
本月热门
【2021生日优惠】持续更新!9月寿星叹Omakase送寿司蛋糕+清酒
2021-08-31
【随时更新】零食速报 每周新款零食、酒品点评
1天前
【特约分享】Happy Hour饮番杯Schweppes®期间限定特饮!9间必去铜锣湾餐厅(上)
2021-08-24
【特约分享】Happy Hour饮番杯Schweppes®期间限定特饮!9间必去铜锣湾餐厅(下)
2021-08-31
自家制作!五间手工意大利面专门店合集
2021-08-24