日出康城嘅朋友等咗咁耐,最近区内终於开咗首间日式料理店!餐厅走高档及精致居酒屋路线,装潢以怀旧复古嘅8、90年代日本文化为主调,天花板上嘅水晶鱼形灯都好吸睛;食物方面由行政总厨石德明团队主理,因为石师傅於小渔村生长,所以对选材方面有份执着,坚持选用最新鲜及最优质嘅海鲜。种类方面提供多款日本料理,如刺身、寿司、卷物、丼饭、小食、天妇罗、串烧、锅物及甜品,大部份食材都由日本直送!香港人而家返唔到乡吓,呢度绝对可以止吓瘾。
白生鱼薄切($158)
日本真鲷刺身再薄切,每一片都好薄身,味道有口感又鲜甜。
日本烟燻鸡胸刺身($92)
提到鸡肉刺身未必个个都敢试,呢度用苹果木烟燻来自福冈嘅鸡胸刺身,有种烟三文鱼嘅感觉大家就易接受啲,酱汁用蛋黄酱及醋自家调制,作为前菜又几开胃。
山一刺身盛($588)
想每款刺身都食到,山一刺身盛就啱晒!共有七款刺身,包括大拖罗、矶煮鲍鱼、牡丹虾、油甘鱼、三文鱼及两款时令刺身,开饭仔当日就系罕有啲嘅金目鲷同北寄贝,款款都好新鲜。
香葱吞拿鱼卷($88)、软壳蟹炸虾卷($78)
卷物方面大推香葱吞拿鱼卷,吞拿鱼人手剁成蓉,入口即溶!软壳蟹炸虾卷就一半系软壳蟹一半系炸虾,一次满足两个愿望。
更多【新店直击】: |
日本博多炸鸡
同样选用产自福冈县嘅「博多地鸡」,弹牙肉质鸡味浓,而且仲炸得酥脆Juicy,酱汁都系自家制,蛋黄酱加上唐辛子,香辣惹味!
玉子豆腐沙律($68)
选用来自日本青森县,蛋黄浓度高达14嘅鸡蛋,经过70度慢煮後,滑溜蛋味香浓。
三文鱼鱼汤泡饭($88)
汤底用上十斤鲷鱼骨熬六小时以上,鲜甜鲷鱼味浓厚,加上脆粒又多一份层次感。
宫崎直送和果子($38/2pc, $72/4pcs)
甜品仲有由宫崎直送和果子,多以红豆馅为主,款式就随机嘅。
地址: 将军澳康城路1号The LOHAS3楼319号舖
文: Yanica
相、片: Tom Li