無論你係潮童定文青，打工仔定學生哥，偶然都總會去旺角一兩次。雖然旺角有唔少特色餐廳，但如果講到想搵間選擇多價錢又相宜嘅Food Court，開飯仔就會推介大型商場隔離嘅旺角熟食中心。由招牌農夫包到懷舊扒餐，清淡啲嘅湯飯到抵食蛋包飯都一應俱全，食多幾次都唔怕悶吖嘛。
傳說中嘅農夫包 澳門翠苑餐廳
無辦法，講到旺角熟食中心無辦法唔提到呢間嘅農夫包，皆因就算你未食過，都一定聽過佢嘅大名。招牌葡式咖喱農夫包有軟殼蟹、牛扒、豬頸肉、雞、牛腩等選擇，用錫紙包住外脆內軟嘅農夫包入面就係餸，咖喱汁就另外裝喺碗裡面俾你任點。佢地嘅鮮茄牛腩湯同凍咖啡一樣有特色又好味，最緊要嘅係分量唔細，大胃王嚟一樣可以滿足而回。
懷舊火焰牛柳 奇華美食中心
睇完葡式代表，不如轉過頭睇返港式代表吖。呢間有常餐、小菜、炒粉麵飯等選擇，不過最多人嚟食佢地嘅鐵板餐。懷舊火焰牛柳呢道菜唔好話扒房，連港式豉油西餐廳都未必有得食。佢地唔單止有，仲要寫明足8安士，上枱嘅時候仲會點埋火。主角牛柳切開中間帶少少粉紅色，口感嫩滑。套餐包埋嘅羅宋湯味道亦對辦，呢個價錢喺旺角收貨有餘啦。
抵食蛋包飯+焗飯 加州陽光
圖：tht_dawn
正所謂「如陽光伴我 清新笑迎面」，呢間出品抵食又大份嘅餐廳對唔少街坊嚟講亦係一道令人愉快嘅陽光。最多食家讃嘅蛋包飯有唔同醬汁同配料選擇，最重要嘅都係大份得嚟，入面嘅炒飯粒粒分明又足料。雖然蛋皮比日式嘅偏乾同薄，但勝在有住家Feel。意式香草茄汁鹹牛脷焗飯係另一推介，牛脷唔過鹹而鬆軟，值得一試。
更多【熟食中心尋寶】： |
清清地食湯飯 豐衣粥食
如果想食清淡少少嘅話，就可以嚟呢檔食碗湯飯喇。老闆將唔同湯飯嘅配搭寫哂喺檔口，例如胡椒豬肚蝴蝶腩、竹笙津白鹹雞、紫菜肉碎班片等等，睇名都覺得相當吸引。而且佢地嘅魚湯同醉雞湯都落足材料煲，香而不膩，有食家話熱辣辣食完飲完一大碗好似出咗一身汗咁爽歪歪。另外仲有臘味飯同陳村河等選擇。
大大份雙餸飯 好又多快餐
圖：Andrewaz
餐廳名已經講明一切：好、多、快。好係在於夠彈性，雙餸得、三餸得，轉返做單餸又得，得咗。多係指餸菜選擇夠多，蕃茄滑蛋、魚香茄子、粟米魚塊、蒸肉餅、雞翼等等。快就當然講緊佢地做嘅係快餐啦，賣點係分量夠大，細食嘅朋友仔記得嗌少飯唔好做大嘥鬼。另外仲有蒸魚飯，真係有成條蒸魚㗎。
企理大眾化車仔麵 長旺餐館
喺熟食中心大家應該都預咗環境唔會同商場餐廳一樣咁靚，但都唔代表要食得嗱咋嘅。呢間車仔麵檔算比較企理，餸菜選擇多價錢又公道。咖喱魚蛋爽口又大粒，瑞士雞翼入哂味，呢兩款都係比較多食家推薦嘅。唔夠喉嘅話仲有泰式扎肉、五香牛肚、南乳豬手、蜜汁叉燒等等。最低消費係兩餸一麵，不過嗌三餸就跟埋冷熱飲品，計落抵食好多。
文：Cathy