甜品控又有餐厅要bookmark喇!最近尖沙咀就新开咗一间轻食西餐厅,主打Roll cake瑞士卷及Pound Cake磅蛋糕,更有得自家制作个人化Roll Cake。虽然餐厅主打蛋糕,但咸点都有惊喜,因为注重健康,所有食物都用最新鲜及靓嘅食材制造,而且装潢以白色为主调,简洁明亮,配上乾花,绝对适合相机食先。
原个Roll cake($108起)
讲到瑞士卷,好多人嘅印象都系蛋糕内卷入奶油嘅瑞士卷,但呢度嘅Roll cake就与众不同,制成卷蛋後打横放好,再铺上渐变色嘅忌廉,特别吸睛。而且选材都好认真,用日本鸡蛋、法国面粉及忌廉、海藻糖制作,甜而不腻。而且餐厅仲供应多款toppings畀你DIY专属卷蛋,好似蛋白脆脆、花及水果等,零舍有心思。蛋糕有朱古力、士多啤梨、黑加仑子、伯爵茶、日本茶及芒果热情果口味。
法国牛油蛋糕伴雪糕 ($68)
法国牛油蛋糕同样都系用海藻糖及法国面粉制成,口味有柠檬、苹果肉桂及伯爵茶,口感松软,细细件就唔怕邪恶。
白酒萝勒煮大蚬($ 88)
餐厅亦有供应多款有诚意咸食,好似呢个白酒萝勒煮大蚬,蚬肉弹牙,食得出大蚬鲜甜,加白酒及萝勒更能突出蚬嘅优点。
Xo酱油炸鬼大蘑菇有机鸡肉濶条面 ($ 118)
中西合壁嘅一道菜,将中式嘅油炸鬼及调味Xo酱加入西式意粉,味道又几夹,意粉吸收晒Xo酱,香浓惹味。
蕃茄黑醋烤天然鸡腿肉($148)
选用无激素天然鸡腿肉,鸡味重,鸡皮薄身无皮下脂肪,可以放心食~蕃茄黑醋酱汁味道酸酸甜甜,系一道清新之选!
地址: 尖沙咀河内道18号K11购物艺术馆B1楼B104号舖
文、相: Yanica